Көлік салығын төлемесе не болады

2025 жылғы көлік салығын жүргізушілер 2026 жылы 1 сәуірге дейін төлеуге тиіс. Оны есептегенде бұрынғы мөлшерлеме қолданылаы. Ал 2026 жылы сатылған машинаның салығын 2027 жылы 1 сәуірге дейін жеңілдіктерді ескере отырып төлейсіз. Мемлекетпен дер кезінде есеп айырыспаған азаматтарды не күтіп тұр?

Биыл 2 сәуірден бастап кешіккен әр күн үшін өсімпұл қосылады. Салық пен өсімпұл 10 мамырға дейін төленбесе, салық органдары мәжбүрлеп өндіріп алады. Қарыз сомасы 1 АЕК-тен (2026 жылы 4325 теңге) асса, борышкерге салық бұйрығы жолданады. Осыдан кейін бес күн ішінде берешекті өтеу қажет. Жүргізуші тағы төлем жасамаса, салық бұйрығын мәжбүрлеп орындату үшін іс жеке сот орындаушының қолына түседі.

Сот орындаушысы мәжбүрлеп өндіріп алу шарасын қолға алады. Атап айтқанда, азаматтың банк шоты мен мүлкіне тыйым сала алады. Қарыз сомасы 40 АЕК-тен (2026 жылы 173 000 теңге) асса, жүргізушінің шетелге шығуына уақытша шектеу қоюы мүмкін. Берешегі бар азаматты сот орындаушылары Мемлекеттік кірістер комитеті және полицейлермен бірге көшеде тоқтатуға да құқылы.

Салық кодексі бойынша көлік салығының 3 жылдық ескіру мерзімі бар. Бірақ ол жаңадан анықталған міндеттемеге ғана қатысты.

Жақында қаржылай қиындыққа тап болған азаматтар көлік салығын кепілсіз кейінге қалдыру мүмкіндігіне ие болуы ықтимал. Бірақ оны рәсімдеу процесі біршама күрделі, сондықтан бұған тек қарызы көп жүргізушілер жүгінгені жөн.

Мопед үшін салық төлеудің қажеті жоқ.