Ұлыбританияда электромобиль иелерінің шығыны артуы мүмкін. Жергілікті БАҚ хабарлағандай, билік батареялы көлік иелеріне арнап жаңа салық енгізуді жоспарлап отыр.
Жаңа ереже бойынша электрокар жүргізушісі жүрген әрбір миль үшін ақы төлейді. The Daily Telegraph басылымы төлем әр мильге 3 пенс (17 теңге) болады деп жазды. Демек жылына шамамен 12 500 миль (20 000 км) жүретін Британия тұрғыны ел қазынасына 375 фунт (258 600 теңге) құяды.
Қосымша салық енгізуге электромобиль көбейіп, бензин мен дизель сатудан түсетін табыс кемуі ықпал етіпті.
Биыл сәуірден бастап Ұлыбританияда электрокар иелері VED деп аталатын жылдық көлік салығын төлеуге міндетті болды. Төлем мөлшері автомобиль тіркелген мерзімге байланысты 20–195 фунт (13.8–135 мың теңге) шамасында. 2025 жылғы 1 сәуірден кейін тіркелген машинаға жеңілдік бар, салық сомасы — 195 фунт емес, 10 фунт.
Билік автомобильдің жыл бойы жүрген қашықтығын автоматты бақылайтын жүйе енгізбейді. Жүргізушілер алдағы жылы қанша жүретінін шамалап айтып, сол бойынша төлем жасайды. Егер өзі атағаннан көп жүргені анықталса, қосымша ақы береді, аз жүрсе, артық ақша келер жылы шегеріледі.
Жаңа салық 2028 жылы күшіне енуі мүмкін. Бірақ бұл жүйені сала мамандары сынға алды, олар түрлі кедергі салдарынан электромобильге көшу қарқыны бәсеңдей бастағанын айтты.
Комментариев: 0