Көлік салығын 1 сәуірге дейін төлеу қажет. Мерзім жақындап қалды. Бірақ қос дөңгелекті көлік мінгендер салық төлей ме деген сұрақ жауапсыз қалып отыр. Қазақстанда аталған техниканы тіркеу процесі 2025 жылы басталған, Ұлттық статистика бюросы қазірге дейін 45 мыңнан аса мопед тіркелгенін хабарлады.
Салық кодексінің 565-бабына сәйкес мотоцикл, мотороллер, мотошана және шағын кеме үшін салық сұралады. Бірақ олар қозғалтқыш қуатына қарай жіктеледі:
- 55 кВт-қа (75 ат күші) дейін — 1 АЕК;
- 55 кВт-тан (75 ат күшінен) жоғары — 10 АЕК.
Елдің басты қаржылық құжатында мопед туралы еш ақпарат жоқ.
ҚР «Жол қозғалысы туралы» Заңына сай «мопед — көлемі 50 текше сантиметрден аспайтын іштен жанатын қозғалтқыш немесе электромотормен жүретін әрі ең жоғары жылдамдығы сағатына 50 километрден аспайтын екі немесе үш дөңгелекті механикалық көлік құралы. Құзырлы орган оны мокик, скутер және сипаттамасы осыған ұқсас өзге механикалық көліктерге теңестірген
Мотоцикл — бүйірлік тіркемесі бар немесе жоқ, қозғалтқышпен жүретін екі дөңгелекті механикалық көлік құралы. Жүксіз салмағы 400 келіден аспайтын үш және төрт дөңгелекті көлік құралы. Көлемі 50 текше сантиметрден асатын скутер мен сипаттамасы осыған ұқсас өзге де техника түрлері мотоциклге жатады».
Ал мотороллер не екені заңда нақты жазылмаған.
Мемлекеттік кірістер комитеті осы деректі талдап, Салық кодексінде шынымен мопед туралы мәлімет жоқ екенін мойындады. Мопед мотоциклге жатпайды, ал мотороллердің нақты анықтамасы еш жерде жоқ.
Салықшылар «демек, оған көлік салығы қарастырылмаған» деген қорытынды шығарды.
Комментариев: 0