Қазақстанның жаңа автомобиль нарығы жыл басында үнемі үздік нәтиже көрсете алмайды. Биыл қаңтар да солай болды. Автодилерлер 11 261 көлік сатты. Бұл жеңіл автомобиль, жеңіл коммерциялық техника және автобус пен жүк көліктерін қоса есептегендегі нәтиже. Соңғы екеуін қоспағанда, 10 727 машина иесін тапты. Бұл 2024 жылдың қаңтарындағы көрсеткіштен 1.87 % артық.
2024 жылғы желтоқсанмен салыстырғанда жеңіл автомобиль саудасы — 55.26 %, жалпы нарық көрсеткіші 56 % төмендеді. Бірақ былтыр рекордтық нәтиже тіркелгенін айта кеткен жөн.
2025 жылғы қаңтар қорытындысы бойынша жаңа автомобильдер нарығындағы үздік 10 марка
| Орын | Марка | 2025 жылғы қаңтардағы сауда |
| 1 | Hyundai | 3175 |
| 2 | Chevrolet | 1189 |
| 3 | Kia | 980 |
| 4 | Chery | 709 |
| 5 | Geely | 660 |
| 6 | Toyota | 602 |
| 7 | JAC | 589 |
| 8 | Jetour | 581 |
| 9 | Haval | 580 |
| 10 | Changan | 372 |
Hyundai қаңтардағы ең танымал бренд болды. Марка автосалондары 3175 көлік өткізді. Екінші орында 1189 машина сатқан Chevrolet тұр, үздік үштікті Kia (980 дана) түйіндеді. «Хёндэ» мен «Шеви» саудасы былтырғы сәйкес кезеңмен салыстырғанда жоғарыласа, Kia 20.3 % төмен көрсеткіш тіркеді. Төртінші орындағы Chery алатындар да азайған (709 дана, —34.4 %). Былтыр қаңтарда 323 моделі жолға шыққан Geely биыл қаңтарда 660 көлік өткізіп, рейтингте бесінші сатыға көтерілді.
Танымал модельдер тізімінде Hyundai Tucson алда келеді. Бір айда 1452 кроссовер иесін тапты. «Кобальт» (1113 дана) пен Hyundai Elantra (571) екінші және үшінші қатарға жайғасты. Үздік бестікке Hyundai Santa Fe (473) мен Kia Sportage (460) енді.
BYD саудасы қалай болып жатыр
BYD бренді биыл қаңтарда ресми Қазақстан нарығына шықты. Марка топтамасында Han электромобилі мен Song Plus кроссоверінің гибрид және электрлі нұсқасы бар.
Брендтің нәтижесі қазірше көңіл көншітпейді. BYD бір айда небәрі 16 автомобильдің кілтін тапсырды. Оның бәрі — бензин-электрлі Song Plus
Комментариев: 0