Биыл I тоқсанда автонарықта Hyundai көш бастады

Қазақстан ресми автонарығы 2025 жылы рекорд жаңартқан, бірақ биыл көрсеткіш сәл төмен. Наурызда елдегі автосалондар жеңіл коммерциялық техниканы қоса алғанда 17 099 жаңа автомобиль сатты. Бұл ақпандағыдан (13 399 машина) біршама жақсы, бірақ былтырғы наурызбен салыстырғанда 12.9 % аз.

Қазақстан автокөлік одағы (ҚАО) хабарлағандай, биыл I тоқсанда жалпы 44 757 жаңа автомобиль иесін тапты. Бұл 2025 жылдың осы кезеңіндегі нәтижеден (46 854 машина) 4.5 % кем. ҚАО басшылары ақпанда нашар нәтиже көрсеткен нарық наурызда оңала бастағанын айтып отыр. Демек биылғы сауда динамикасы II тоқсаннан кейін нақты белгілі болады.

Наурызда Hyundai өнімдері көп өтті. Марка дилерлері 3192 автомобиль саудалады. Екінші және үшінші орынға Kia (2317 дана) мен Chevrolet (2142) жайғасты. Үздік бестікке Changan (1766) мен Chery (1270) енді. Ең қызығы, өткен айда осы бес марканың ішінде Kia мен Changan-ның ғана саудасы өскен. Атап айтқанда, Kia — 9.3 %, Changan 151.2 % өсім көрсетті.

2026 жылғы наурыздағы сауда нәтижесі бойынша үздік 10 марка

Танымал модельдер тізімінде әдеттегідей Cobalt алда келеді, Chevrolet саудасын қыздырып отырған да осы модель. Бір айда 1965 седан өтті. Екінші жүлде Hyundai Tucson-ға (1516 дана) бұйырды, үздік үштікті Kia Sportage (841) түйіндеді.

1 / 10

• 
• 
• 
• 
• 
• 
• 
• 
• 
• 

1 / 10

Алғашқы ондыққа енген Changan CS35 Max (X5 деп те аталады) ерекше назар аудартып отыр. Наурызда ресми түрде нарыққа шыққан модельдің 513 данасы өтіп, рейтингте сегізінші орынға көтерілді. Алдыңғы жетекті кроссовер шамамен 9 млн теңге тұрады, машинаның 147 ат күшіне ие 1.5 литрлік турбомотормен жүретін жалғыз комплектациясы бар.

Ақпанда топ-5 тізімге енген Kia Soluto наурызда оныншы орынға ығысты. Бірақ сан жағынан жағдайы жақсарған: ақпанда — 382 дана, наурызда — 416 дана.

Үш айлық қорытынды бойынша брендтер арасында Hyundai жеңімпаз атанды, бренд 8658 машина сатты. Екінші қатарға Kia (7493 дана) орналасса, Chevrolet (6629) үшінші орынға тұрақтады. Hyundai көрсеткіші 2025 жылға қарағанда 25.8 % түссе, Kia мен Chevrolet тиісінше 52.8 % және 10.3 % өсім көрсетті.

2026 жылдың I тоқсанындағы сауда нәтижесі бойынша үздік 10 марка