2024 жылы жаңа автомобиль нарығында рекорд жаңарды

2024 жылы жаңа автомобиль нарығында рекорд жаңарды

Дилерлер алдыңғы жылғыдан көп көлік сатты.

2023 жылы Қазақстандағы автосалондар 198 686 автомобиль өткізіп, рекорд орнатқан. Бірақ бұл рекорд ұзақ сақталмады, былтыр дилерлер 205 111 машина саудалап, жаңа жетістікке жетті.

Қазақстан автомобильдер одағы хабарлағандай, былтырғы көрсеткіш бір жыл бұрынғыдан 3.2 % жоғары болған. Бұл +60.2 % өсім көрсеткен 2023 жылғы нәтижеден төмен. Бірақ биыл жыл басында сарапшылар мен нарық ойыншылары болжағандай, сауда артты.

Жыл қорытындысы

Биыл да Hyundai елдегі ең танымал марка атанды. 12 айда автосалондар 44 218 машина сатты. Екінші орында Chevrolet (30 927 дана) тұрса, үздік үштікті әдеттегідей Kia (23 045) түйіндеді.

Жалпы автомобиль саудасы қызғанымен, топ-3 тізімдегі брендтердің көрсеткіші төмендеді. Атап айтқанда, Hyundai — 5.4 %, Kia — 9.6 %, Chevrolet — 32.5 % нашар нәтиже көрсетті.

Сауда өсіміне Қытай маркалары әсер етті. Мысалы, рейтингте төртінші орында тұрған Chery-дің саудасы 21.7 % артып, 14 883 машина сатқан. Ал бесінші орындағы JAC 11 771 (+56.7 %) автомобиль саудалады. Топ-10 тізімге мына маркалар да енді: Toyota (11 045 дана +2.7 %), Haval (10 983, +45.3 %), Jetour (9507, +141.9 %), Changan (8510, +39.8 %) және Geely (8252, +126.5 %).

2024 жыл қорытындысы бойынша жаңа автомобильдер нарығындағы үздік 10 марка

Орын Марка 2024 жылғы сауда
1 Hyundai 44 218
2 Chevrolet 30 927
3 Kia 23 045
4 Chery 14 883
5 JAC 11 771
6 Toyota 11 045
7 Haval 10 983
8 Jetour 9507
9 Changan 8510
10 Geely 8252

2024 жылы Қазақстандағы автосалондар кілтін тапсырған барлық автомобильдің 39 %-ы Қытай өнімі, сарапшылар бұл көрсеткіш әлі өседі деп болжап отыр. Елімізге жаңа Қытай брендтері келіп жатыр. Биыл Қазақстанда BYD электрокар мен гибрид сата бастайды, Aito наурызда ресми автосалонын ашады.

Былтыр жаңа көліктердің көптеп өтуіне түрлі жеңілдік, акция және жаңа қаржылық бағдарламалар оң әсер етті. ҚАО президенті Анар Мақашеваның айтуынша, клиенттерге үкімет, Қаржы нарығын реттеу және дамыту агенттігі, екінші деңгейлі банктер және микроқаржы ұйымдары бірлесе жағдай жасап отыр.

Танымал модельдер

Chevrolet Cobalt биыл да елдегі ең танымал модель атанды. Седан саудасы жыл аяғына қарай күрт өсіп, Hyundai Tucson-ды басып озды. «Шеви» моделінің — 26 537 данасы, «Хёндэ» кроссоверінің 22 389 данасы иесін тапты. Үшінші орынды Kia Sportage (8834 дана) алды. Ал топ-5 тізімге Hyundai Elantra (6520) мен Chery Tiggo 2 (5310) енді.

Желтоқсандағы сауда

2024 жылдың соңғы айында рекорд жаңарды. Желтоқсанда автосалондар 25 570 машина сатты, бұл одан бір жыл бұрынғы сәйкес кезеңнен 8.6 % артық. 2023 жылы да автонарықтағы ең нәтижелі ай желтоқсан болған. Жеңілдік пен жаңа жыл алдындағы жаппай сату саудаға оң әсер еткені анық.

2024 жылы жаңа автомобиль нарығында рекорд жаңарды

Желтоқсандағы рейтингте 6.3 мың машина сатқан Hyundai бірінші орынға жайғасты. Ал екінші және үшінші орын Chevrolet (4.5 мыңға жуық) мен Kia-ға (2 мыңға жуық) бұйырды.

Комментариев: 0

Чтобы оставить комментарий, вам необходимо зарегистрироваться или авторизоваться.