Қазақстан нарығындағы бәсекелес модельдер

Жаңа автомобильді әркім әртүрлі таңдайды. Кей сатып алушының ойында нақты бір нұсқа болады, ол басқасына мүлде қарамайды. Екінші топ бір кластағы бәсекелестер арасынан таңдау жасайды. Ал үшіншісі қалтасына қарайды. Kolesa.kz сарапшылары ел тұрғындары қай марка мен модельді жөн көретінін анықтап, автонарық мамандарына арналған Алматыдағы «Жаңа автомобиль» конференциясында эксклюзив дерек ұсынды.

Қалай есептедік
Марка мен модель арасындағы бәсекелестік ортақ принцип бойынша анықталды. Яғни, мамандар 2025 жылы екі брендті немесе екі модельді қатар қараған нақты аудиторияның пайызын есепке алды.

Біздің елде көбіне Hyundai мен Kia клиенттерінің талғамы ұштасып жатады. Kolesa.kz мәліметінше сайтта осы екі брендтің жалпы аудиториясының 13.8 %-ы екі марканың модельдерін қатар қарастырған.

Графикадан сатып алушылардың қытай автоөнеркәсібіне қатты қызыққанын байқау қиын емес. Үздік 12 жұптың тоғызында Қытай брендтері бар әрі оның тең жартысында қытай өнімдері бізге жақсы таныс жапон немесе кәріс компанияларымен бәсекеге түскен.

Нақты модельдер бойынша айтсақ, таксистер арасында танымал гибрид BYD Destroyer 05 пен электрлі Hongqi E-QM5 немесе «туысқан» Hyundai Tucson мен Kia Sportage арасында бәсекелестік бар екенін байқаймыз. Бұған таңғалудың қажеті жоқ.

Toyota Camry алғысы келген азаматтардың шамамен 5.2 %-ы гибрид Li L6-ға назар аударған, ал 4.7 %-ы Hyundai Tucson-ды қарастырыпты.

Deepal S07 мен Li L6 арасында таңдау жасаған тұрғындарға да таңғалдық. Өйткені екі модельдің гибрид күштік құрылымы мен генератор рөлін атқаратын қозғалтқышының көлемі бірдей болғанымен, өлшемі мен бағасы мүлде сәйкес келмейді. Мысалы, сұр импорт арқылы келген S07-нің құны 11 млн теңгеден басталса, Li L6-ны кем дегенде 20 млн теңге тұрады.