Иә, Алатау. Мереке қарсаңында ҚР президенті оның арнайы құқықтық режимі туралы заңға қол қойды. Құжатқа сәйкес инновациялық қаланың әкімшілігі қоршаған ортаны қорғаудың жоғары деңгейін қамтамасыз етуге тиіс. Атап айтқанда, Алатау билігі «әкімшілік белгілеген критерий мен мерзімге сай көлік құралдарын пайдалануға қойылатын талаптарды, соның ішінде олардың қалаға не оның жекелеген функциялық аймағына кіруіне тыйым салуды, шектеуді не ол үшін арнайы экологиялық төлем алуды» бекіте алады.
Бұған дейін Алматы әкімдігі ескі машинадан қала орталығына кіргендерден ақы алу жүйесін енгізбек болған, бірақ Әділет министрлігі норманы мақұлдамады. Енді мегаполис билігі техникалық тексерістен өтпеген көліктің шығарынды деңгейі төмен аймақтарға кіруін шектеуді жоспарлап отыр.
Алатауға қайта оралайық. Конституциялық заңның 54-бабына сәйкес мемлекет шаһарға «байланыс, сенсорлық және цифрлық желі, жасанды интеллект, пилотсыз және инновациялық көлік құралы, роботты жүйе және өзге де технологиялық шешімдерді қоса алғанда, инновациялық технология мен технологиялық инфрақұрылымды сынау және қолдану» үшін эксперименттік құқықтық режим енгізу құқығын береді.
Осы режим мен сынақтан өткен технологиялар нәтижесін кейін елдің басқа өңірлерінде қолдануға мүмкіндік бар. Демек қалаға кіру үшін ақы төлеу жүйесін Алатауда сынақтан өткізген соң мұндай тәжірибені басқа аймақтар, соның ішінде Алматы билігі қолданып көруі ықтимал.
Ал 57-бап Алатауға эксперименттік құқықтық режим аясында міндетті сынақтан кейін басқарылатын және пилотсыз ұшу аппараттары мен транспорт жүйесінің өзге де аппараттарын пайдалануға жағдай жасайды. Ол үшін мамандар жер немесе су бетінен 3000 метр биікте арнайы әуе кеңістігі аймағын салады. Сондай-ақ ұшатын инновациялық аппарат үшін адам мен жүк тасуға арналған бағыттар мен дәліздер белгіленіп, олар аэронавигация қызметі және қажетті инфрақұрылыммен қамтамасыз етіледі.
Комментариев: 0