LEZ атауын алған пилоттық жоба 2026 жылы 28 сәуірде іске қосылды. Мегаполистің экология және қоршаған орта басқармасы хабарлағандай, жоба мына көшелер арасында жүзеге асады: оңтүстікте — Бөгенбай батыр, солтүстікте — Абай, шығыста — Желтоқсан, батыста — Достық даңғылы. Жоба операторы — «Алматы Паркинг» КМК. Қала әкімдігі Kolesa.kz редакциясына таза аймақтың шекарасын белгілейтін жол белгісі мамырдың аяғына дейін орнатылатынын айтты.Жүйе сынақ режимінде жұмыс істеп тұр. Әкімдік қазірше жүріп-тұруды шектеу, айыппұл салу немесе кіргені үшін ақы алу сияқты әрекетке бармайды.
Экологтар қазіргі басты мақсат цифрлы инфрақұрылымды сынақтан өткізіп, көлік легі мен оның ауа сапасына әсері туралы дерек жинау деді.
Пилоттық жоба аясында мамандар мынадай жұмыс атқарады:
- Ақылды камера, радар сезгектері және көлік құралын автоматты тану жүйесінің әртүрлі ауа райы мен жол қозғалысы жағдайында жүргізушілерге әсер етпей, дұрыс жұмыс істеуін тексеру.
- Ауа сапасын өлшейтін сезгектерден алған деректі көлік легімен синхрондап, белгілі бір учаскеде трафиктің экологияға қалай әсер ететінін бағалау.
- Деректі қауіпсіз жеткізу арналарының жұмысын реттеу және
IT-қызмет, экологтар мен жол қозғалысын басқару мамандары арасындағы өзара іс-қимыл процесін пысықтау.
Бұл болашақта нақты реттеуші шешім қабылдағанға дейін бірыңғай, сенімді цифрлық платформа құруға мүмкіндік береді. - Қалалық мобильділікті терең талдап, ақылды қала стратегиясын одан әрі дамыту үшін дерек қорын құру.
Пилоттық кезеңде аймаққа кіруді шектемей, технологияны сынақтан өткізу басты назарда болады.
«Жүргізушілердің қозғалысын шектегелі отырған жоқпыз, алдымен технологияның өзін сынап көреміз. Сезгектер ақпаратты қаншалық дәл жинайтынын, жүйе қаншалық жылдам дерек алмасатынын және инфрақұрылымның дайындығын анықтаймыз. Болжамға емес, нақты дерекке сүйене отырып, қала ауасын тазартуға көмектесетін сенімді цифрлық негіз дайындап жатырмыз», — деді басқарма өкілдері.
Сынақ кезеңі 2026 жылы 31 желтоқсанға дейін жалғасады. Тест жүріп жатқан аумақта көлік қалыпты режимде жүре береді.
Алматыда шығарынды деңгейі төмен аймақтарды белгілеуге қатысты экологиялық ереже 2025 жылғы 30 желтоқсанда қабылданған.
Биыл наурызда әкімдік ескі техниканың Алматыға кіруіне тыйым салмай, LEZ аймақтарды белгілеуге бел буды. Шенділер алдымен орталықтан орын бөліп алып, кейін мегаполистің әкімшілік шекарасына дейін кеңейтеді.
Бүгін өткен брифингте Eco Almaty директорының орынбасары Айдана Қасен 2027 жылдан бастап экологиялық нормаға сай келмейтін машиналар LEZ аймаққа кіре алмайтынын айтты.
«Егер автомобиль техникалық тексерістен өтіп, экологиялық нормаға сәйкес екенін растамаса, қала ішінде жүргенде оны камера тіркейді. Мұндай көлік иесіне алдымен LEZ аймаққа кіргені туралы „Өтінеміз, техникалық тексерістен өтіңіз“, — деген push-хабарлама келіп, бірнеше күн уақыт беріледі», — деді Қасен Өңірлік коммуникациялар қызметінде өткен брифингте.
Жүргізуші бұл талапты елемей, тексерістен өтпеген машинамен LEZ аймаққа тағы өтіп кетсе, айыппұл төлейді.
Комментариев: 0