Aurus седандарды Senat деп аталатын жеке суббрендке бөлді. Жаңа модельдер Aurus Senat лимузинінен арзан болады және көптеп шығады.
Уақыт пен қаржыны үнемдеу үшін марка бұрыннан таныс жолды таңдаған. Бес метрлік люкс седан V6 қозғалтқышын алған және 2024 жылы рестайлингтен өткен Hongqi H9-ға негізделген. Мұндай көліктер Kolesa.kz-те де сатылып жатыр. Машинаны сәндеуге Rolls-Royce өнімдерін жасаған дизайнер Джайлс Тейлор жауапты. Автомобиль бірнеше жыл бос тұрған Санкт-Петербургтегі бұрынғы Toyota зауытының конвейеріне тұрады.
Демалыста іске қосылған Senat-тың ресми сайтында көліктің кейбір сипаттамасы туралы ақпарат шықты. Мысалы, белсенді пневматикалық аспа, 326 ат күші мен 450 Нм момент беретін 3 литрлік турбомотор, 8 сатылы автомат қорап және толық жетек жүйесі бар. Автомобиль алғашқы жүздікті 6.5 секундта еңсереді. Дизайнерлер салонын табиғи былғарымен қаптап, ағашпен әрлеген. Жабдықтар тізіміне артқы орындықтардағы массаж және желдету функциялары, проекциялық дисплей, автоматты түрде жабылатын есіктер және т.б. кіреді.
Senat 900-дің ресми тұсаукесері 4 маусымда ПМЭФ-2026 алаңдарының бірінде өтеді. Бірнеше дереккөз бағасы 10–12 млн рубль деп жазды. Бұл нағыз Aurus Senat-тан бес есе арзан.
Комментариев: 0