Астанадағы LRT қашан іске қосылады

LRT сынақтан сәтті өтті. Мамандар желіні, рельстерді, бекеттер мен байланыс, басқару, қауіпсіздік жүйелерін тексерген.

«Қазір эстакада маңындағы аумақты көгалдау, депоны тазалау жұмыстары жүріп жатыр. Бұл оны іске қосуға әсер етпейді. LRT қызметке кірісуге дайын. Салтанатты ашылу шарасы осы демалыста (16-17 мамыр. Kolesa.kz ескертп.) өтеді», — деді City Transportation Systems басқарма басшысы Асылбек Дүйсебаев.

Қазір жүрдек трамвай қозғалатын желінің жалпы ұзындығы 22.4 км. Қала ішінде 15 пойыз қатынайды. Әрқайсысына 600 адам сыяды. Олар 6:00 мен 23:00 аралығында мына бағытта жолаушы тасиды:

• әуежай;
• Қабанбай батыр даңғылы;
• «Астана Жұлдызы» стеласы;
• Mega Silk Way сауда орталығы, Ботаникалық бақ;
• Abu-Dhabi Plaza;
• Министрліктер үйі;
• Арыс көпірі;
• Қалдаяқов көшесі;
• Ұлттық музей;
• «Нұрлы жол» вокзалы.

Билет бағасы — 200 теңге. 7-18 жастағы тұрғындар мен жеңілдікке ие жолаушылар тегін мінеді. Жол ақысын LRT кассасынан билет алу арқылы не TVM-автомат беретін картамен, банк картасымен және мобильді қосымша көмегімен төлеуге болады.