Жүргізушілер Алматыға кіргені үшін ақы төлемейді

Алматының ауасын қорғау ережесін мәслихат былтыр желтоқсанның аяғында бекіткен. Қаланы шығарынды деңгейі төмен аймақтарға бөлетін және онда қозғалысты шектейтін құжат 10 наурыздан бастап күшіне енеді.

Time.kz хабарлағандай, экологиялық ереже әзірлеу жөніндегі жұмыс тобының мүшесі Ерлан Бұзырбаев жобаның бастапқы нұсқасында экологиялық класы төмен көліктерге ақылы режим енгізу жоспары болғанын айтты. Әділет министрлігі бұнымен келіспегендіктен идеядан бас тартуға тура келді, себебі мұндай норма заң деңгейінде бекітілуі керек. Қолдау шараларын енгізу де қажет болар еді. Билік ескі машиналарды сатып алмайды.

Оның орнына Алматыда LEZ (Low Emission Zone — шығарынды деңгейі төмен аймақ) пайда болады. Нақты жері белгісіз, бірақ Бөгенбай батыр — Достық — Желтоқсан — Абай көшелерінің шекарасы алғашқы таза аймақ атануы мүмкін. Жоба қашан іске қосылатыны да беймәлім. Болашақта LEZ аймақтар кеңейеді.

Ережеге сәйкес таза аймаққа (кейін жалпы Алматыға) бензин, дизель тұтынатын және газбаллоны бар экологиялық класы Еуро-0 мен Еуро-5 арасындағы техника еркін кіреді. Бірақ шығарынды деңгейі нормадан аспауға тиіс. Газ шығару жүйесін тексеру 2027 жылдың басында басталады. Электромобиль және сутекпен жүретін автомобиль бұған қатыспайды.

Қалғандары стандарт техбайқаудан бөлек, «ЭкоАлматы» ЖШС-мен келісімге келген арнайы станцияға барып, тексерістен екі рет өтеді. Кейін жыл сайын шығарынды мөлшерін анықтайды. Яғни техбайқау үшін екі рет ақы төлеуге тура келеді. Мұндай станциялар қашан толық іске қосылатыны белгісіз.

Қазір заң бойынша коммерциялық мақсатта қолданылмайтын және шыққанына 7 жылдан аспаған жеңіл көлік техбайқаудан өтпейді. Дегенмен енді тексерістен кім өтетінін шенділер шешетін сияқты.

Тексеріс нәтижесін электрондық хаттамадан көруге болады, ол бір жылға жарамды. Жүргізуші осындай құжатпен шығарынды деңгейі төмен аймақта еркін жүреді. Техбайқаудан өтпеген немесе нормаға сай келмейтін машина қалаға кірмейді.

Бақылаумен бейнекамералар айналысады. Біреу таза аймаққа заңсыз кірсе, Әкімшілік кодекстің 334-бабы бойынша айыппұл арқалайды: жеке тұлға — 10 АЕК (2026 жылы 43 250 теңге), заңды тұлға — 100 АЕК. Қайта бұзса, айыппұл мөлшері екі есе өседі.

06.03.2026 ж. 15:00-де қосылған мәлімет:

Қалалық экология басқармасы Kolesa.kz редакциясына хабарлағандай, техбайқау үшін екі рет төлемейсіз. Экологиялық тексерістен өту үшін төленетін сома техникалық байқаудың құнына қосылады. Бұл нақты қалай жүзеге асатыны әзірге белгісіз. Әкімдік толық ақпарат пайда болғанда хабарлаймыз деп уәде берді. Жаңалықтарды бақылап отырыңыз.