Қазақстанда мопед тіркеу биыл 20 қаңтарда басталған. Ішкі істер министрлігі Алматыда 2.5 мыңнан аса скутер тіркелгенін хабарлады. Алғаш тіркелген мопедшілерге мемлекеттік нөмір салтанатты түрде табысталды. Бірақ кейін жұмыс кешіге бастады: ақпанда мопедшілер нөмір тақтасы жоқ болғандықтан скутерін тіркей алмай жүргенін айтып, шағымдана бастады. Мемлекеттік нөмір алу үшін бірнеше күн күтуге тура келеді екен.
13 наурызда № 1 арнайы халыққа қызмет көрсету орталығында мопедке арналған нөмір болған жоқ. Мұны Kolesa.kz тілшісі өз көзімен көрді. Алматы коды жазылған тақтайша да жетіспейді. Басқа аймақтардың нөмірі аз болса да бар, мысалы, 07 тұр. 13 наурызда бір ғана адам 02 (Алматы) коды бар нөмір алды.
«Азаматтарға арналған үкімет» қазір Алматыда 02 коды бар мопед нөмірі жетпей жатқанын мойындады.
«Мемлекеттік корпорация өтінішті белгіленген мерзімде жіберіп отыр. Нөмір жазылған тақтайшаны Ішкі істер министрлігі дайындайды», — деді «Азаматтарға арналған үкімет» МК.
Мемлекеттік нөмір дайындауға жауапты ҚР ІІМ «Ақпараттық-өндірістік орталық» республикалық мемлекеттік кәсіпорны Алматыдағы зауыт нөмір тақтасын тоқтаусыз шығарып жатыр деп мәлімдеді. Олар процессинг орталығынан түскен барлық өтінішті дер кезінде өңдеп, тақтайша қорын толықтыру үшін жаңа өтініш түскенін күтіп отыр екен. Бірақ ақпараттық-өндірістік орталық өкілдері қаңтар мен ақпанда қанша нөмір тақтасын шығарғанын айта алмады.
Қазақстандағы мопед ең көп қала — Алматыда небәрі 2.5 мың скутер тіркеліпті. Билік 5 сәуірге дейін 50 мың мопедті есепке қоюды жоспарлап отырғанын ескерсек, оған қалай үлгеретіні түсініксіз. Астанада 170 мототехника тіркелген.
Редакцияға мопедшілер қала көшелерінде мемлекеттік нөмір таққан скутер неге аз екенін айтып берді. Көптеген мопед иесі құжатын рәсімдеп, нөмірін алған соң оны жүксалғышқа салып қойыпты. Олар 5 сәуірге дейін камера мен полицейлерден қорықпай, еркін жүргісі келеді.
Комментариев: 0