Полиция нөмірі жоқ мопедті айыптұраққа қояды

ҚР Ішкі істер министрінің орынбасары Игорь Лепёха қазірге дейін 18 200 мопед тіркелгенін хабарлады.

«Елде қанша мопед бар екенін ешкім білмейді, әртүрлі дерек бар. Бір анығы, былтыр 22 мың, биыл 2.5 мың адам осы санаттағы жүргізуші куәлігін алды. Бірақ оның бәрі мопед мінеді деуге келмейді, кейбірі мопеді болмаса да куәлік алған болуы ықтимал. Бірақ енді қанша техника тіркелсе, соншасы ғана жолға шығады. Қалғаны жүре алмайды. Осы орайда халыққа 4 сәуірге дейін аз уақыт қалғанын айтқым келеді. Мопедін тіркегісі келетіндердің бәрін қабылдау үшін арнайы ХҚКО-лардың жұмыс уақытын ұзартуды сұрадық. Осы мерзімге дейін тіркелмегендер жолға шыға алмайды», — деді вице-министр.

Ол полицейлер тіркелмеген мопедті ұстап, айыптұраққа қоятынын, иесі барлық құжатын рәсімдеген соң ғана қайтарып алатынын атап өтті. Скутерді айыптұрақтан шығарып, арнайы ХҚКО-ға тексеруге апармаса, оны тіркеу мүмкін емес. Шенді бұл мәселені қалай шешу керек екенін айтқан жоқ.

Ал «Азаматтарға арналған үкімет» өкілдері Kolesa.kz редакциясына кейінгі күндері арнайы ХҚКО-лардың жұмыс кестесі өзгермегенін хабарлады.

«Арнайы орталық аумағында орналасқан, бірақ Ішкі істер министрлігіне бағынатын тексеру пунктерінің жұмыс уақыты ұзарған шығар», — дейді мемлекеттік корпорация.

Мемлекеттік нөмірі жоқ немесе есепке қойылмаған мопед мінген жүргізуші 10 АЕК (39 320 теңге) айыппұл төлейді. Ал жалған нөмір тақса — 15 АЕК (58 980 теңге), жүргізуші куәлігі болмаса 5 АЕК (19 660 теңге) санап беруге тура келеді.

Мопедтің құжаты болмаса, оны айыптұрақтан шығарып алу қиынға соғады. Техниканың сізге тиесілі екенін дәлелдеу қиын, өйткені көп адам скутер алғанда сатып алу-сату келісімін жасамайды, тіпті айфонға айырбастап алғандар бар. Алматыда айыптұрақта бірнеше мың скутер тұр. Полицияның айтуынша иелері техника өзінікі екенін растай алмаған.

Демек, мопедті тіркемесеңіз одан айырылып қалуыңыз мүмкін.