А1 санатындағы мототехниканы сақтандыру қанша тұрады?

Биыл 5 сәуірден бастап мемлекеттік нөмір, техпаспорт және жүргізуші куәлігінсіз мопед жүргізуге тыйым салынады. «Көлік құралы иесінің азаматтық-құқықтық жауапкершілігін міндетті сақтандыру туралы» заңға сай А1 санатындағы мототехниканы сақтандыру полисінсіз жүргізуге де болмайды. Сақтандыру сомасы міндетті сақтандыру туралы заңның 19-бабындағы кестеге сай есептеледі.

Жақында ғана А1 категориясындағы жүргізуші куәлігін алған 16-25 жас аралығындағы мопедші 2025 жылы 12 айға жарамды міндетті сақтандыру полисін алу үшін қанша төлейтінін есептеп көрейік. Бұрын ешқандай құжаты болмаған, рамасында нөмірі жоқ мопед автоматты түрде 2025 жылы шыққан жаңа техника ретінде тіркеледі. Мототехниканың көбі Алматыда болғандықтан, Алматыда есепте тұрған, ешқашан апатқа түспеген скутерді мысалға аламыз.

Сақтандыру сомасы былай есептеледі:

• 2025 жылғы базалық сақтандыру сыйақысы — 7470.8 теңге (1.9 АЕК);
• Алматыда тіркелген көлік құралы коэффициенті — 2.96;
• мототехника коэффициенті (мопед мотоциклмен бір санатта болады) — 1;
• жасы және жүргізу тәжірибесі коэффициенті — 1.1;
• техника қолданыста болған уақыттың коэффициенті — 1;
• 3-класс коэффициенті (жол апатына түспеген) — 1

.

Барлығы: 7 470.8 × 2.96 × 1 × 1.1 × 1×1 = 24 324.9 теңге.

Бірақ 7 сәуірде жаңа сақтандыру класы күшіне енген соң жүргізуші куәлігін жаңа алған азаматтарға арналған полис қымбаттайды. Тәжірибесі жоқ жүргізуші 3 емес, А класын алады, оның коэффициенті 1.8 болады. Яғни, біз жоғарыда есептеген соманы 1.8-ге көбейтеміз. Нәтижесінде 43 784.86 теңге болады.

Демек, биыл сақтандыру полисіне біршама қомақты сома жұмсамау үшін жүргізуші куәлігін жаңа алған мопедші техникасын тезірек тіркеп, ертерек сақтандыру полисін алғаны жөн. Сондай-ақ сақтандыру компанияларының деректер базасы жаңа тіркелген мопедті еш қиындықсыз қабылдайтынын анықтадық.

Әкімшілік кодекстің 230-бабы 2-тармағына сай сақтандыру полисін алмай көлік жүргізген адам 10 АЕК (2025 жылы — 39 320 теңге) айыппұл төлейді.