Алматы полициясы: кейбір электровелосипед мопед саналады

Қазақстанда тіркелмеген мопед заңға томпақ келіп, емін-еркін тізгіндеу мүмкін болмай қалған соң біраз курьер электрлі велосипедке көшті. Мұндай көліктің кейбірі сағатына 40-45 км жылдам қозғалады және 400 Вт мотормен жабдықталады.

Полиция департаменті қуаты 250 Вт-тан жоғары және жылдамдығы 25 км/сағ-тан асатын көлік құралы мопед қатарына кіретінін ескертті. Ондай техниканы міндетті түрде есепке қойып, техпаспорт, мемлекеттік нөмір, сақтандыру полисін алу керек, ал жүргізушіде куәлік болуға тиіс.

«Бұл қауіпсіздік үшін ғана емес, көлік иесі үшін де маңызды. Техниканы рәсімдеу азаматқа меншік құқығын беретіндіктен біреу ұрлап кетсе, заңды иесіне қайтару жеңіл болады», — деді Алматы ПД Әкімшілік полиция басқармасының басшысы Асхат Құлбаев.

Қазір тәртіп сақшылары тек түсіндіру жұмыстарын жүргізіп жатыр, бірақ жақында құжатсыз жүрген байкерлерге айыппұл сала бастайды.