«ҚазАвтоЖол» ҰК" Алматы облыстық филиалы директорының міндетін атқарушы Болатбек Айтбаевтың айтуынша, 2021 жылдың басынан бері Алматы — Қорғас тас жолында алты рет бетон жабыны көтерілген.
«Басты себеп — ауа температурасының жоғарылауы. Екінші себеп — құрылыс кезінде бюджет қаражатын үнемдеу мақсатында осы жол бөлігіне инертті материал (құм, қиыршық тас, гранит және т. б. — редакциядан) төгілген. Жолды күтіп ұстау барысында, белгілі бір уақытта бетон тақтасының жігін ауыстырып отыру қажет. Тексеру кезінде аталған жік ұсақ инертті материалға толып қалғаны анықталды. Бетон тақта ыстықтан ұлғайған кезде осы ұсақ материалға тіреліп, қысыммен көтеріліп кетеді», — деп түсіндірді Айтбаев.
Алматы — Қорғас тас жолы төрт жыл бұрын пайдалануға берілді. Жол жігіне төгілген инертті материал неге әлі резеңкеге ауыстырылмағанын Айтбаев айтқан жоқ. Бұрынғы жылдары да осындай аптап ыстық болған, бірақ жолдағы бетон жабыны көтерілмеген еді.
Айта кетейік, шілденің басында Алматы — Қорғас тас жолында ақау пайда болды. Жол жөндеушілер оны тез арада қалпына келтіріп, ел аумағындағы бетон жолдарды тексере бастады.
Бұған дейін ел президенті ақылы жолдардың сапасын сынға алды. Қасым-Жомарт Тоқаевтың айтуынша, ақылы жол керек, бірақ жол сапасы мен қызмет көрсетуді жақсарту қажет.
Алматы — Қорғас тас жолы ақылы. Трассаның басынан соңына дейін жүргізушілер көлік құралының типіне байланысты 300-7610 теңге аралығында ақша төлейді.
Комментариев: 0