Үкіметтің кеңейтілген отырысында Қасым-Жомарт Тоқаев жол сапасы елдің көлік әлеуетін арттыруда шешуші рөл атқаратынын айтты. Қазақстанда жол жөндеу сапасы әлі де әділ сынға ұшырап жатыр.
«Бұған жақында болған жүк көлігі жүргізушілерінің наразылығы дәлел. Ақылы жолдарды енгізу — әлемдік тәжірибеге сай келетін дұрыс шешім. Үлкен елде бюджет есебінен ғана жол салу мүмкін емес. Сонымен қатар Қазақстан транзиттен ақша табуы керек. Бірақ ақылы жолдың сапасы жақсы, жол бойындағы қызмет көрсету деңгейі жоғары болуы қажет. Үкіметтен бұл мәселені ерекше бақылауда ұстауды сұраймын», — деді президент.
Өткен аптада ғана Алматы — Қорғас ақылы жолында бетон жабыны ісініп, трассада трамплин пайда болды.
Биыл мамырда жүк көлігін жүргізушілер жаңа ақылы жолдардың ашылуына қарсы шықты. Жүргізушілер алдымен жол сапасын жақсартып, инфрақұрылымды дамытуды, содан кейін ғана жолға ақша жинауды талап етті.
Алғашында ҚР ИИДМ жаңа ақылы жол бөліктері 2021 жылы сәуірдің аяғында іске қосылады деп хабарлаған. Бірақ мамырда министрліктің баспасөз қызметі тариф нақтыланбағандықтан, жаңа ақылы жолдарда ақша жинау маусымға шегерілгенін мәлімдеді. Ал жүк тасымалдаушылардың наразылығынан кейін ақылы жолдардың сапасын тексеретін арнайы комиссия құрылды. Аталған жолдарда төлем қабылдау тағы да кейінге қалды.
Комментариев: 0