2 ақпанға қараған түні Алматыда қар жауа бастады. Әкімдік берген мәлімет бойынша 7:00-де 10 см қар түскен, ол түске дейін жауатын көрінеді. Мегаполис көшелерін 452 арнайы техника мен 1183 жұмысшы тазалап жатыр. Бірақ олар тек делегация жүретін көшелерді тазалап жатқан сияқты.
Алматыны ақ ұлпа басса болды, қозғалыс қиындап, кептеліс болатыны таңсық емес, алайда бүгін оңтүстік астанада Еуразия мемлекетаралық кеңесінің отырысы және Digital Almaty форумы өтеді. Сол себепті полицейлер әр көшені бір жауып, жағдайды мүлде ушықтырып жіберді. Билік таратқан ақпаратқа сүйенсек, Әл-Фараби, Сейфуллин даңғылдары мен Саин, Жароков, Шаляпин көшелері жабылады.
«Яндекс. Карты» сервисінің 9:00-дегі дерегі бойынша кептеліс 8 балдық деңгейге жетіп, Саин, Абай, Жандосов, Тимирязев және Әл-Фараби мен Саинға бұрылатын жерлер қою қызыл түске боялды. Одан бөлек Садықов және Дулати көшелері жабық тұрғанын байқауға болады.
«2ГИС» сервисі кептеліс 10 балға теңесті дейді, ал жүргізушілер Әл-Фараби мен Жароков қиылысындағы жолайрықта қозғалыс шектелгенін жарыса жазып жатыр.
Комментариев: 0