Құлжа тас жолындағы жаңа жолайрық жүргізушілердің көңілінен шықпады

2019 жылы басталған Алматыдағы Құлжа тас жолы мен Бұқтырма көшесінің қиылысындағы жолайрықтың құрылысы толығымен биыл қазан айының басында аяқталды. Салынғанына бір айдан астам уақыт өтті, дегенмен жүргізушілер әуежайға апаратын айналма жолда баяғыдай кептеліс болатынына наразы.

Жүргізушілердің наразылығын әлеуметтік желіден табу оп-оңай. Бейнероликтерден айналма жолға кіру және шығу кезіндегі көлік нөпірін көруге болады. Бұған себеп — кең жол аяқталғаннан кейін жүргізушілер сол баяғы тар жолға тап болады.

Тұрғындардың пікіріне сүйенсек, жолайрық проблеманы азайтудың орнына одан әрі көбейтті.

— Жаңа жолайрықтағы кептеліс?! Бірде-бір патрульдік полиция жоқ, қозғалыс өз бетімен кеткен. Кептеліс одан әрі ұлғаятын болса бұндай жолайрық не үшін салынды?!

«Алатау трассасынан жолайрыққа өту, одан шығу өте қиын, полицейлер таңғы көлік қозғалысын неге реттемейді? Тоқтамай өту үшін таңғы 6:30-ға дейін шығып кету керек, сұмдық қой бұл» деп жазады желі қолданушы.

Жақын жерде «Апорт» сауда ойын-сауық орталығының ашылғаны бұл жағдайға оң әсер бермегенін айта кетуге болады.

— Бұл жолайрықтар мәселені шешкен жоқ. Рысқұлов кептелістен көз ашпайды, ал «Апорт» ашылғаннан кейін айналма жолға дейін көлік қаптап тұратын болды. Кеше, жексенбі күні үйге бір сағатта жеттім, ал жұмыс күндері екі сағаттан астам уақытым кетеді, — деді жүргізуші.

View this post on Instagram

A post shared by Кульджинский тракт 🚦 (@kris_p_kuljinka)

Алматы әкімдігі Tengrinews.kz порталының сауалына жол бөлігін жүктемеден арылту және қарбалас сәтте оңтүстік бағытта кептеліс болдырмау үшін Рысқұлов даңғылы мен Бұқтырма көшесі арасындағы тас жолды қайта құрылымдау жөнінде жобалық-сметалық құжаттама әзірленіп жатқанын айтты.

Мәселе бұнымен шешіле қояды дегенге сенім жоқ, тек ол жолдың келесі тарылған аймағына ауысады. Kolesa.kz редакциясы әуежайға апаратын бұрынғы айналма жолдағы жағдайға толық талдау жасап жатыр, жаңалықтарымызды қадағалап отырыңыздар.