Алматыда көлікті тұраққа қою ережесі өзгерді

Оңтүстік астана мәслихаты Алматы қаласындағы Жол ережесімен реттелмеген бөлікте жол қозғалысын ұйымдастыру қағидаларын бекітті. Құжат биыл 5 тамызда ресми түрде жарияланды және 16 тамызда күшіне енеді.

Алматыдағы көлік иелері үшін не өзгереді

Осы күннен бастап ақылы тұрақ 20:00-ге дейін жұмыс істейді. Қазір режим 19:00-ге дейін. Енді мұндай орындар ресми түрде көк түсті үзік сызықпен белгіленеді.

«Алматы паркинг» компаниясы тұрақты пайдаланғаныңыз үшін әр сағат емес, минут сайын төлем алады. Бір минуттың нақты құны жазылмаған, сондықтан бұл үшін жеке құжаттың жариялануын күту қажет. Бұған дейін шенеуніктер тариф әзірге өзгермейтінін, бірақ кейін қайта қаралуы мүмкін деді. Төмендемейтіні анық.

Көп пәтерлі үйдегі тұрғын және тұрғын емес үй-жайлардың иесі немесе жалға алушылар жеңілдік алады. Бұл бизнес-орталықтарға қатысты емес. Қағидада олар бір тұрақтан орындар таңдап, тегін пайдалана алады және бір үйден бір көлік құралы тұра алады деп жазылған. Үй-жай орналасқан жерден 500 метр радиустағы тұрақты таңдауға болады, оны басқарушы ұйым белгілейді.

Ережеде азамат басқарушы ұйымның интернет-ресурсы, яғни «Алматы паркинг» сайты немесе азаматтардың барлық өтінішін қабылдайтын және өңдейтін бірыңғай платформа («еOtinish» арқылы жүзеге асуы мүмкін) арқылы өтініш жіберсе, тегін пайдалану құқығын алады.

Әзірге алдын ала өтініш жібере алмайсыз. Kolesa.kz редакциясына компанияның call-орталығы хабарлағандай, өтініш тек 16 тамыздан бастап қабылданады. Оларды қарауға қанша уақыт кететіні белгісіз. Операторлар неге жеңілдікті алдын ала рәсімдеп, 16 тамыздан бастап бірден пайдалануға болмайтынын түсіндірмеді.

Ақылы тұраққа нашар күйдегі, дұрыс орнатылмаған, тозған (сәйкестендіруге кедергі келтіретін) немесе бөгде зат, материал не құрылғы арқылы өзгерген мемлекеттік нөмірі бар автомобильді қоюға болмайды.

Велосипед пен самокатқа арналған бөлек тұрақ

Қалада тұрақ орындары арнайы таңбамен белгіленеді. Техниканы тек осы арнайы орындарға қоюға болады. Тегін.

Айыптұрақ ақылы болады

16 тамыздан бастап Алматыда машинаны айыптұрағына жеткізу және онда сақтау ақылы болады. Тарифтер әзірге белгісіз. Астанада көшеде дұрыс тұрмаған көлік қана ақылы айыптұраққа кетсе, Алматыда айыппұл арқалауға себеп болатын жағдайлар көп. Олардың барлығы Әкімшілік кодекстің 797-бабында бар. Мысалы, сақтандырылмаған автомобильді басқару, мемлекеттік нөмірсіз немесе құжатсыз жүру және т. б.

Аулаға кіруді шектеу

Ережеге шлагбаум мен басқа қоршауларды орнатуға қатысты жеке бөлім қосылды. Олар машина мен жаяу жүргінші легін реттеу және көлік құралдары рұқсатсыз өтпеу үшін орнатылады. Қоршау немесе шарбақ пайдалануға болады. Бірақ міндетті түрде аудан әкімдігімен келісіп орнату керек.