Жол ережесін білу деңгейін тексеру жүргізушінің жауапкершілігін арттыру және ереже бұзу әрекетінің алдын алу мақсатындағы қосымша шара саналады. Айыппұл төленген соң жүргізуші арнайы қаулы арқылы теориялық емтихан тапсыруға барады. Бұл жағдайда жүргізуші уақытша көлік жүргізу құқығынан айырылады, бірақ куәлігі бірден күшін жоймайды. Екі ай ішінде білімін дәлелдеуі қажет, әйтпесе, сот шешімімен жүргізуші куәлігі жарамсыз деп танылады. Мұндай жағдайда жүргізуші куәлігін қайта алу үшін практиканы да тапсыруға тура келеді.
Әкімшілік кодексте жол ережесін бұзғаны үшін қайта емтихан тапсыруға міндеттейтін бес норма бар:
- ҚР Әкімшілік кодексінің
594-бабы 4-бөлігі — бір жылда екінші рет кептеліс кезінде қиылысқа шығып, көлденең бағыттағы көлік қозғалысына кедергі келтірсе (айыппұл — 7 АЕК немесе 30 275 теңге).
- 596-баптың 4-бөлігі — бір жылда екінші мәрте жаяу жүргіншілер жолымен, жол жиегімен немесе тротуармен жүрсе, сондай-ақ көлiк құралын жолдың жүріс бөлiгiне қойса, қарсы жүрiп өту немесе басып озу қағидасын бұзса, ұйымдасқан көлiк колоннасын немесе жаяу колоннаны кесiп өтсе не оған қосылып алса (айыппұл — 13 АЕК).
- 598-баптың 2-бөлігі — бір жылда екінші рет арнайы жарығы мен дыбыс сигналы қосылған қызметтік көлікке жол бермесе (айыппұл — 40 АЕК немесе 20 сағатқа дейін қоғамдық жұмыстарға тарту).
- 599-баптың 2-бөлігі — бір жылда екінші мәрте бағдаршамның тыйым салатын сигналын немесе реттеушінің тыйым салатын ишарасын елемесе (айыппұл — 15 АЕК).
- 600-баптың 2-бөлігі — бір жылда екінші рет жаяу жүргіншілерге немесе жол қозғалысының өзге қатысушыларына (арнайы қызмет көліктерін қоспағанда) жол бермесе (айыппұл — 15 АЕК).
Бұған дейін депутаттар он және одан көп мәрте ереже бұзған жүргізушіні жол ережесі бойынша теориялық емтихан тапсыруға жіберуді ұсынған. Бірақ бұл бастама әлі қолдау тапқан жоқ.
Комментариев: 0