Сенатор қала ішінде орташа жылдамдықты тіркеуді ұсынды

Сенатор Марат Қожаев бүгін депутаттық сауалында жол қауіпсіздігін арттыруға қатысты ойын білдірді. Депутат ірі қалаларда көлікті агрессивті жүргізетіндер, жылдамдықты асыратындар, түнде жарысатындар жиі кездесетіндіктен, бұл өзекті мәселе екенін атап өтті. Кейбіреулер айыппұлды жылдамдық пен жайлылыққа кеткен қосымша шығын ретінде қабылдайды. Олар ауыр апатқа себеп болмайынша көлік тізгіндей береді. Статистика бойынша жол-көлік оқиғасының 90 %-ына жүргізушілер кінәлі және басты себеп — жылдамдық асыру.

«Қазір камералар көбінесе бір жерде тұрып жылдамдық тіркейді. Жүргізуші камераға жақындағанда баяулап, өтіп кеткен соң жылдамдықты қайта арттырғандықтан бақылаусыз қалады. Осылайша жылдамдық сақтауды емес, жүйені алдауды үйренеді. Жол ережесіне сәйкес жылдамдықты тек белгілі бір бөлікте емес, жолдың басынан аяғына дейін сақтау керек. Сондықтан қазіргі тәсіл нәтиже бермейді. Билік трассаларда орташа жылдамдықты тіркеу механизмін заң жүзінде енгізді. Бұны елді мекендерде қолданатын уақыт келді деп санаймын», — деді депутат.

М. Қожаев жол ережесін жүйелі түрде бұзатындардың жауапкершілігін арттыратын механизм қажет деді. Онда айыппұлдың жартысын төлеу, қайта емтихан тапсыру, куәліктен айыру мерзімін ұзарту, жол ережесін әдейі және өрескел бұзған жағдайда әкімшілік қамау сияқты жеңіл жаза болмауға тиіс. Осы мақсатта заңнамаға ережені елемейтіндерді анықтайтын нақты критерийлер мен оны тіркейтін автоматты механизмдер қосу қажет.

Сенатор тәртіпке бағынатындарды сақтандыру полисіне немесе сервистік өнімдерді пайдаланғанда жеңілдік беру арқылы ынталандырған жөн деп ойлайды.

«Көлік тізгіндеуге берілетін рұқсатты бағалағанда қауіпке негізделген жаңа тәсіл қолдануды ұсынамыз. Ол — жүргізушілердің жолдағы мінез-құлқын және жол қозғалысына қауіпсіз қатысу қабілетін кешенді бағалау. Осыған байланысты агрессивті жүргізуге бейімдігін тексеру, көлік басқару қауіпсіздігіне әсер ететін мінез-құлық факторлары мен халықаралық тәжірибедегі басқа бағалау түрлерін енгізу керек», — деді депутат.

Оның ойынша бұл тәсіл салдармен күресуге емес, қауіптің алдын алуға бағытталған. Сол кезде куәлік қана емес, жүргізушінің жол қауіпсіздігін сақтау, адам өмірі мен қоршаған ортаны қорғау қабілеті ескеріледі.

Билік сенатордың ұсынысын қабылдаса, жолда тәртіп күшейе ме, қалай ойлайсыз?

Биыл ақпанда Марат Қожаев жол ережесін өрескел бұзатындарды айыппұлды бір апта ішінде 50 % жеңілдікпен төлеу мүмкіндігінен айыру, бір жылда оннан көп ереже бұзған азаматтарды қайта емтихан тапсыруға жіберу және оған дейін куәлігінен уақытша айыру сияқты нормалар қоспақ болған. Алайда идеяны билік әзірге қолдаған жоқ.