17 қазанда әкімдік вафли тәрізді жаңа таңба сызылған көше қиылыстарының тізімін жариялады. Сары жолақты мамандар мына жерлерге сызды:
- Абай — Назарбаев;
- Абай — Масанчи;
- Абай — Брусиловский;
- Абай — Момышұлы;
- Абай — Тұрғыт Өзал;
- Абылай хан — Бөгенбай батыр;
- Сәтбаев — Наурызбай батыр;
- Сәтбаев — Жароков;
- Жандосов — Жароков;
- Розыбакиев — Төле би.
Қала билігі бұл жаңа таңбаның мақсаты — жүргізушілерді тәртіпке шақыру, жол-көлік оқиғасының санын азайту, таңертең және кешке болатын кептелісті жеңілдету екенін атап өтті.
«Жауапты орган ереже бұзғандарды тіркейтін камералар орнатып жатыр. Оң нәтиже берсе, жоба жалғасын табады», — деді шенеуніктер.
Жол ережесі бойынша алдыда кептеліс болса және ол жүргізушінің тоқтауына әкелсе, көлденең келе жатқан көліктерге кедергі келтірсе, қиылысқа шығуға тыйым салынады. Мұндай жағдайда Әкімшілік кодекстің 594-бабы 1-бөліміне сай ескерту жасалады немесе 3 АЕК көлемінде айыппұл салынады. Сары таңба — кептеліс кезінде тұруға болмайтын аймақты көрсетеді.
Билік бұл таңбаны сынақ ретінде бірнеше жыл бұрын енгізе бастағанымен, жүргізушілер оны жиі елемейді, ал полиция әзірге айыппұл салмайды.
Sergek Group Kolesa.kz редакциясына камералар әлдеқашан сынақтан өтіп, қиылыста қалғандарды тіркеуге дайын екенін айтты. Тек биліктен бұйрық күтіп отыр-мыс. ІІМ Әкімшілік полиция комитеті таңба ішінде қалғандарға қандай жаза қолданатынын әкімдік пен жергілікті полиция департаменті бірлесе шешуге тиіс деді. Алматыда кептеліс үлкен проблемаға айналғанына қарамастан, ереже бұзғандарды анықтау және жазалау не себепті әлі басталмағаны белгісіз.
Комментариев: 0