Xiaomi жоба басталған сәттен бері шығыннан көз ашпай жұмыс істеп жатқан. Бірақ компания бұл сала ерте ме, кеш пе, пайда әкелетініне сенімді болды. Xiaomi Group президенті Лю Вэйбин конференцияда 2025 жылдың III тоқсанында Xiaomi EV алғаш рет пайда тапты деп мәлімдеді. Электрокар сату бойынша жылдық жоспар да орындалуға жақын.
Xiaomi биыл клиенттерге 350 мың көлік жеткізуді жоспарлаған. Бұл межеге осы аптаның аяғында жетеді. Өндірушінің электрокар өткізу қарқыны артып келеді. Xiaomi алғашқы 100 мың машинасын 230 күнде сатса, одан кейінгі 200 мың экземплярға 232 күн ғана жұмсады.
Қазанда 48 654 электрокар иесін тапты, бұл бренд тарихындағы ең үздік көрсеткіш. Жыл аяғына дейін 400 мың модельдің кілтін тапсыруы мүмкін.
20 қарашада фирма 500 мыңыншы автомобилін құрастырды. Жарты миллион техника шығаруға бір жыл жеті ай кеткен. Жергілікті БАҚ хабарлағандай, осының арқасында Xiaomi Қытай автөнеркәсібінде ең жылдам дамып жатқан компания атанып отыр.
Қазір Xiaomi EV топтамасы SU7 седаны, оның қуатты Ultra нұсқасы және YU7 кроссоверінен тұрады. Марка ірі гибрид кроссовер әзірлеп жатыр деген ақпарат бар.
Комментариев: 0