Chery Еуропа нарығындағы орнын қызық жолмен нығайтпақшы. Британия және Қытай басылымдары Jaguar Land Rover мен Chery Ұлыбританияда өндіріс орнын ашу жөнінде келіссөз жүргізіп жатқанын хабарлады.
Қытай концерні жаңа зауыт салмай, бұрын Jaguar автомобильдерін шығарған, қазір бос тұрған кәсіпорынды іске қоспақшы. Британиялық марка тек электромобиль ұсынуға дайындалып жатқандықтан қазір топтамасында дәстүрлі моторлы көлік жоқ.
Осындай ынтымақтастық жұмыс орындарын сақтап қалуға ғана емес, шенеуніктердің елдегі автоөндіріске қатысты мақсатына жетуіне де көмектеседі деген болжам бар. Ұлыбритания үкіметі 2035 жылға қарай жыл сайын 1.3 млн техника құрастыруды көздеп отыр. 2025 жылдың қорытындысы бойынша нақты көрсеткіш — 738 мың машина.
Бұл JLR мен Chery арасындағы алғашқы серіктестік емес. Олар Қытайда Jaguar және Land Rover өнімдерін құрастыратын бірлескен кәсіпорын ашқан. Жоспар бойынша Freelander жеке брендке айналуға тиіс. Оның тұсаукесері биыл өтеді.
Комментариев: 0