Volkswagen Group модельдерінің жартысынан бас тартуы мүмкін

Бірнеше айдан бері түрлі халықаралық басылымдар концерн ішіндегі дереккөзге сілтеме жасай отырып, Volkswagen Group-тың қиын жағдайы туралы хабарлап келеді. Проблема бар екенін автоөндірушілер тобының басшылары да мойындаған. Ал 9 шілдеде компания жақын жылдарға арналған ресми жоспарын жариялады.

VW Group жылына 12 млн машина сату туралы бұрынғы амбициясынан бас тартады. Жаңа меже — 9 млн дана. Еуропада да, Қытайда да өндіріс көлемі қысқарады.

Сондай-ақ компания қазіргі модельдер топтамасына өзгеріс енгізеді. Бұл процесс аяқталған соң модельдер саны екі есе азаюы мүмкін. Бірақ VW Group нақты қай модельдер өндірістен алынатынын хабарлаған жоқ.

Тағы бір басты өзгеріс комплектацияның әртүрлілігіне қатысты болады. Компания ресурсты ең қажет функцияларға шоғырландыру үшін опциялар пакетінің санын 75 % азайтуды жоспарлап отыр.

Құжатта техникалық және бағдарламалық шешімдерді бірізге түсіру қажет екені жазылған. Бұған дейін VW Group бас директоры Оливер Блюме концерн қытайлық платформада жасалған автомобильдерін әлемдік нарыққа шығаруы мүмкін екенін айтқан. Жаңа жоспар осы болжамды растап тұрғандай көрінеді. Сондай-ақ инвестициялық портфельді түзету де жоспарда бар. Бұл кей брендті (мысалы, Ducati және Lamborghini) сату жөніндегі қауесеттің бос сөз емес екенін аңғартады.