Аустралияда Қытай көліктері көш бастауы мүмкін

Аустралия көлік өндірісінен біржола бас тартқаннан кейін елдегі жаңа автомобиль нарығы импортқа тәуелді. Импорттық баж салығы жоқ (дилерлер тек 10 % ҚҚС төлейді) Аустралия Қытай автоөндірушілері үшін тартымды елге айналды. CarNewsChina хабарлағандай, 2010 жылдан бері мұнда он жаңа автоөндіруші орнықса, тоғызы — Қытайдан шыққан компаниялар.

VFACTS мәліметінше биыл маусымда Аустралия халқы Қытайда жасалған 46 592 автомобиль сатып алған. Бұл жаңа көліктер нарығының 35.5 %-ы. Брендтер арасында Toyota көшбасшы. Маусымдағы көрсеткіші 19 124 данаға жетті. Дегенмен BYD Toyota-ға барынша жақындап, 18 881 машина саудалады.

Аустралияда электромобиль саудасы артып келеді. Маусымда олардың үлесі елдегі жаңа көліктердің 23.3 %-ын құрады. Импортталған әр бес электрокардың төртеуі Қытайда жасалған. Батареялы машина нарығының үздіктері: BYD, Tesla, Geely, Kia, Jaecoo және Zeekr.

Аустралия автомобиль дилерлер қауымдастығы (AADA) сауда қарқыны қазіргідей қалса, 2035 жылға қарай жаңа автомобиль нарығының шамамен 58 %-ы Қытай көліктеріне тиесілі болатын шығар деп болжады.

Қазақстанда биыл алты ай қорытындысы бойынша Қытай брендтерінің модельдері жаңа жеңіл көлік пен жеңіл коммерциялық техника нарығының 46 %-ын алып отыр.