Mercedes-Benz шілдеде Венгрияның Кечкемет қаласындағы зауытына 1 млрд еуро жұмсап, жөндеуден өткізді. Нәтижесінде кәсіпорын аумағы 200-ден 440 гектарға ұлғайып, неміс компаниясының Еуропадағы ірі өндіріс алаңына айналды. Зауытта дәстүрлі мотормен жүретін автомобильді де, электромобильді де құрастыруға мүмкіндік бар. Сондай-ақ қызметкерлер саны қазіргі 5 мыңнан 8 мың адамға көбейеді.
Зауытқа мұндай ауқымды өзгеріс енгізудің өз себебі бар: Венгрияда өндірістің өзіндік құны Германияға қарағанда 70 % төмен. Бұл туралы Handelsblatt басылымы хабарлады. Венгрияда жұмысшыларға орта есеппен сағатына — 15.6 еуро, Германияда 49.5 еуро төленеді. Оның үстіне Венгрияда мерекелік демалыс күндері аз әрі стандарт жұмыс аптасы — 40 сағат, ал Германияда автомобиль өндірісі сияқты ауыр өнеркәсіпте бұл көрсеткіш 35 сағаттан аспайды.
Сондықтан бұған дейін бюджеттік «мерседестерді» ғана шығарған Кечкеметтегі зауытта енді жоғары санатты модельдер де жасалады. Қазір кәсіпорын GLB-ден бөлек, C-класты да құрастырады, жақында бұл қатарға батареялы GLC қосылады.
Ал Германияда өндірісті сақтап қалу үшін Mercedes-Benz шығынды қысқартуға мәжбүр, ол үшін арнайы төлем мөлшерін өзгертіп, жұмысшылардың еңбек өнімділігін арттырмақ (жалақыны көтермей). Бұл неміс жұмысшыларына ұнамайтыны анық.
Комментариев: 0