АҚШ президенті Дональд Трамптың бастамасы әлем автоөнеркәсібіне шамамен 12 млрд доллар шығын әкелді. The Wall Street Journal сарапшылары автомобиль саласындағы бұл жағдайды коронавирустан кейінгі ең ірі қаржылық дағдарыс деп атап, алдағы уақытта жағдай ушығуы мүмкін деді.
Басылым ірі автоөндірушілер жариялаған қаржылық есепке сүйене отырып осындай ой түйді. Мысалы, Toyota шамамен 3 млрд доллар пайдадан айырылған. Қаржы жылының аяғына қарай бұл көрсеткіш 9.5 миллиард долларға жетуі ықтимал. GM 4–5 млрд доллар жоғалтады деген болжам бар. Volkswagen мен Ford 1–1.5 млрд доллар аралығында шығынға батты.
Қытай компанияларын есептемегенде, әлемдегі ең ірі он автоконцерннің жалпы табысы жыл аяғына дейін төрттен бірге қысқарады. Бұл көрсеткіш 2020 жылдан бергі ең төмен деңгей болады, өйткені пандемия кезінде өндіріс орындары жаппай тоқтап қалды.
Дональд Трамп енгізген шектеу АҚШ-тың отандық автоөнеркәсібін қорғауға бағытталған. Бұл шара Америка нарығында жұмыс істейтін шетелдік автоөндірушілердің зауытын ел ішіне көшіруге ынталандыруы керек еді. Бірақ сарапшылар мұндай мәжбүрлі стратегия кәсіпорындарға қосымша шығын әкеледі әрі өндіріс процесін өзгертуге көп уақыт кетеді деп мәлімдеді. Басқалары АҚШ президентінің бастамасына қарсы жауап ретінде салық мөлшерін өсірді, олар автомобильге ғана емес, басқа да тауарларға әсер етіп жатыр.
Комментариев: 0