Су тасқыны салдарынан он екі трасса жабық

Елімізде күн жылып, қардың еруіне байланысты тас жолдарды, ауылдарды және қалаларды су басып жатыр. Қазір төрт облыстағы жеті жолдың су астында қалғаны белгілі. 2024 жылғы 8 сәуірдегі жағдай бойынша жеті облыстағы (Ақтөбе, Ақмола, Атырау, Қостанай, Павлодар, Маңғыстау және Солтүстік Қазақстан облысы) республикалық маңызы бар 12 трассада көлік қозғалысы шектелді:

• Доссор — Құлсары — Бейнеу — Сайөтес — Шетпе — Жетібай — Ақтау, 210-нан 220 шақырымға дейін, Атырау облысының шекарасынан Боранқұлға дейін.
• Доссор — Құлсары — Бейнеу — Сайөтес — Шетпе — Жетібай — Ақтау, 4-тен 119 шақырымға дейін, Доссордан Құлсарыға дейін.
• Мүкір — Құлсары, 0-ден 136 шақырымға дейін, Мүкірден Құлсарыға дейін.
• Қандыағаш — Ембі — Шалқар — Ырғыз, 3-тен 92 шақырымға дейін, Қандыағаштан Ембіге дейін.
• Денисовка — Тавриченка — Аршалы — Комаровка, 42-ден 96 шақырымға дейін, Приреченкадан Комаровкаға дейін.
• Мариновка ауылына кіреберісте, 0-ден 9 шақырымға дейін.
• Қостанай — Жақсы — Қарабұтақ — Қостанай, 4-тен 5 шақырымға дейін, Гашека көшесінен «Весна» бау-бақшасына дейін.
• Жезқазған — Петропавл, 553-тен 595 шақырымға дейін, Сұрғаннан Солтүстік Қазақстан облысының шекарасына дейін.
• Жезқазған — Петропавл, 595-тен 701 шақырымға дейін, Ақмола облысының шекарасынан Новоишимге дейін.
• Жезқазған — Петропавл, 671-ден 701 шақырымға дейін, Тоқсан биден Новоишимге дейін.
• Волошинка — Сергеевка — Тимирязево, 0-ден 32 шақырымға дейін, Волошинкадан Кривощековқа дейін.
• Рощинское — Корнеевка — Волошинка, 0-ден 47 шақырымға дейін, Рощинскоеден Корнеевкаға дейін.

Өткен сенбіде президент Қасым-Жомарт Тоқаев қазақстандықтарға су тасқынына байланысты үндеу жасады. Мемлекет басшысының айтуынша қазіргі су тасқыны соңғы 80 жылдағы ең ірі тасқын болып отыр. Бүгінгі таңда еліміздің он облысында (Абай, Ақмола, Ақтөбе, Атырау, Батыс Қазақстан, Қарағанды, Қостанай, Павлодар, Солтүстік Қазақстан және Ұлытау облыстарында) төтенше жағдай жарияланды. Премьер-министр басқаратын Республикалық штаб құрылды. Президент зардап шеккендерге қаржылай көмек көрсетілетінін, келген шығынды мемлекет өтейтінін айтты.

Үкімет төлем мөлшері әр аймаққа жеке белгіленетінін хабарлады. Азаматтардың нақты қанша алатынын материалдық шығынды есептейтін арнайы комиссиялар шешеді.

Маңызды! Мемлекеттік қолдау шаралары туралы ресми ақпарат тек 1414 нөмірінен SMS хабарлама арқылы келеді.

Қазақстанда су тасқынынан 3.5 мыңнан астам үй және 150-ден астам жол зақымданған. 65 елді мекен арасында көлік қатынасы тоқтады. Мамандар 75 мыңға жуық адамды қауіпсіз жерге көшірді. Синоптиктердің болжауынша кейбір аймақта су тасқынының екінші легі болады.

Заң бойынша суға кеткен көліктің иесі өтемақы алады.