Еріген қар суы Қазақстанды басып жатқанына бір аптадан асты. Ғимараттар, шаруашылықтар мен жеке заттардан бөлек, көліктер де зардап шекті. Біразы тас жолдарда батып жатыр, басқалары елді мекендердегі аулада су астында қалды. Төтенше жағдайлар министрлігі қанша машина зақымданғанын айта алмайды. Нақты сандар су тасқынымен күрес аяқталып, барлық өңірдегі шығын есептелгеннен кейін белгілі болады.
Көлік иелері заң бойынша суға кеткен автомобиль үшін мемлекеттен өтемақы алуға құқылы екенін білуі керек. Оны алу жолы Табиғи сипаттағы төтенше жағдайлар салдарынан зардап шеккендерге келген зиянды (нұқсанды) өтеу қағидасында көрсетілген.
Барлығына өтемақы төлене ме?
Құжатқа сәйкес мемлекет су тасқыны кезінде мүлкінен айырылған әр адамның шығынын өтеуге тиіс. Бірақ бұл норманың КАСКО полисі бар немесе басқа жағдайлармен қатар табиғи апаттарды қамтитын басқа сақтандыру шартын жасаған көлік иелеріне қатысы жоқ. Олар сақтандыру компанияларынан ақша алады.
Зардап шеккендер қайда жүгінуі керек
Өтемақы алу үшін төтенше жағдай болған ауданның әкімдігіне жүгіну қажет. Мысалы, үш жүк көлігі бірден су астында қалған Қарағанды облысының Шет ауданында машина батып кетсе, шығынды аудан билігі өтеуге міндетті. Төтенше жағдай болған күннен бастап 30 күнтізбелік күн ішінде құжат жинап, өтініш беру керек. Зардап шегуші өтiнiш бере алмаса, мұны оның туыстары немесе басқа адамдар сенiмхат арқылы, зардап шегуші кәмелетке толмаған болса, заңды өкiлдерi де жасай алады.
Қандай құжаттар қажет
Келген шығынның орнын толтыру туралы өтінішпен мыналар қоса берілуге тиіс:
- Зардап шеккен адамның жеке басын куәландыратын құжаттың көшірмесі (табиғи төтенше жағдай салдарынан немесе төтенше жағдаймен күрес кезінде мұндай құжат жоғалған немесе жойылған жағдайда, ішкі істер органдары берген уақытша жеке куәлік).
- Табиғи төтенше жағдай туындаған кезден бастап немесе төтенше жағдайды жою кезінде жоғалған және/немесе бүлінген мүліктің тізімі.
Ережеде өтінішпен бірге техпаспорт көшірмесін қосу қажет екені жазылмаған, бірақ меншік құқығын растау үшін бұл артық болмайды деп ойлаймыз.
Өтініш жібердіңіз. Ары қарай не болады?
Әкімдік өтінішті алған күннен бастап 15 жұмыс күні ішінде тіркеуге және қарауға міндетті. Кейін шенеуніктер тағы 10 жұмыс күні ішінде шығын көлемін бағалауды ұйымдастыруға міндетті. Бағалауды ұйымдастыруға байланысты шығындарды жергілікті атқарушы орган көтереді. Бағалаушыны зардап шеккен адам таңдайды. Екеуі бағалау орны мен уақыты жайлы өзара келіседі.
Су астында қалған көлік үшін қанша төленеді?
Өтемақы мөлшері зақымдалған автомобильді қалпына келтіруге қажет шығындардың немесе оның кеміген бағасына байланысты анықталады. Көлік жөндеуге келмейтіндей зақымдалса, оның қаншалықты тозғанын ескере отырып, нарықтағы құны төленеді. Зақымдалған мүлікті жөндеуге жұмсалған шығындар сәйкес смета немесе калькуляция арқылы расталады.
МАҢЫЗДЫ! Мүлікті (автомобиль) техникалық жағынан қалпына келтіру мүмкін болмаса немесе экономикалық тұрғыдан орынсыз болса, жойылды деп есептеледі. Зақым келген күні шығын мүліктің нарықтағы құнының 80 %-ынан асатын болса, мүлікті қалпына келтіру экономикалық тұрғыдан орынсыз саналады.
Өтемақы қашан төленеді
Аудан әкімдігі бағалаушы қорытындысынан кейін 3 жұмыс күні ішінде бюджетті атқару жөніндегі облыстық уәкілетті органмен келісе отырып, қаражат бөлу туралы шешім қабылдауға тиіс. Шенеуніктерге өтемақы төлеуге қосымша 30 күнтізбелік күн беріледі. Барлық дау сотта шешіледі.
Комментариев: 0