Ресей ескі көліктерге салықты көбейтеді

«Ресей автомобиль дилерлері» ассоциациясы тиісті заң жобасын дайындап жатыр. Оны биыл шілденің аяғында қарауға береді.

Ресейлік салық порталындағы ақпаратқа сәйкес, құжат қазір заң талаптарына сай толықтырудан өтіп жатыр. Бұл кезеңде мамандар негізгі ұғымдарды бекітіп, автомобильдің пайдалану мерзіміне нормативтік талапты анықтайды.

Әзірлеушелер мынадай норма ұсынып отыр:

• шыққанына 15 жылдан асқан автомобильге көлік салығын көбейту;
• мұндай машинаны жылына екі рет міндетті техникалық тексерістен өткізу.

Ассоциация утилизация бойынша мемлекеттік бағдарлама енгізуді ұсынып отыр, өйткені елде утиль алымы бар, бірақ утилизация жұмысы жүйелі емес.

Ассоциация президенті Алексей Подщеколдин жаңа ереже шектен тыс қатаң болмауы керек деп санайды, өйткені қазір Ресейдегі автомобильдердің зауыттан шыққанына орта есеппен 16 жыл болған. Яғни тым қатаң шара азаматтарға әсер етуі мүмкін. Ассоциация дерегі бойынша Ресейдегі 55 млн машинаның 40 миллионы шыққанына 10 жылдан асқан ескі көлікер. Автопаркті жаңарту үшін 10 жыл бойы жыл сайын 3 млн автомобиль сату қажет.

Сондай-ақ шілдеде Ресейде қуаты 160 ат күшінен асатын автомобиль үшін утиль алымы сомасын арттыру туралы талқылау басталды. Қозғалтқыш көлемі 1–2 литр болатын машинаның өзіне тариф бірнеше есе өсуі мүмкін, атап айтқанда, қазіргі 5200-ден 667 400 рубльге дейін.

Ал Қазақстан керісінше ескі көліктерге салықты азайтуды жоспарлап отыр. Жеңілдік жаңарған Салық кодексі жобасына енген. Бірақ сол құжатта құны 75 млн теңгеден асатын машинаға қосымша акциз енгізу туралы бап бар.