Қызылордада жасырын патрульдеу іске қосылды

Қызылорда облыстық полиция департаменті жолға арнайы белгісі жоқ қызметтік автомобильдер шығатынын хабарлады. Олар жылдамдықты автоматты түрде тіркейтін Ekin X-Spotter жүйесімен жабдықталған. Қала мен тас жолдарда қанша патруль жүретіні және олар қандай маркалы/модельдегі көліктерге орнатылатыны белгісіз.

Жергілікті полиция қызметі басқармасы басшысының орынбасары Мұратбек Манатов мұндай кешенді қолдану халықаралық тәжірибеге сай келеді, көптеген елде кеңінен қолданылады және өзінің тиімділігін дәлелдеген деді.

Өндірушінің сайтында жазылғандай камералар тек жылдамдықты емес, көрінетін аймақтағы барлық машинаның нөмірін автоматты түрде анықтап, ұрланған немесе іздеуде жүрген көліктер туралы бірден ескерту береді. Техника жол таңбасын елемеген, автобус жолағымен жүрген, тұрақта дұрыс тұрмағандарды да анықтай алады.

Жасырын патруль кез келген автомобильге орнатыла береді. Мысалы, Атырау облысы мен Көкшетауда бұл жүйе жедел жәрдем көліктеріне орнатылған. Көкшетауда мұндай камералар бір айда 8000-нан астам жол ережесін бұзу фактісін тіркеген. Астана мен Оралда жасырын бақылау 9 жыл бұрын басталған. Алматы облысында полиция белгісі жоқ көліктер EkinPatrol X Spotter Mobile кешенімен жабдықталған.

2016 жылы Қазақстандағы заңгерлер жасырын патрульдеу заңсыз деп, прокуратураға шағымданған еді. Бірақ бұл мәселе жалғасын таппады.