«Үлкен қалаларда жол кептелісіне ден қоюдан көлікті жүйелі басқаруға көшу қажет. Бұл азаматтардың мобильділігіне, қауіпсіздікке және қала ортасының сапасына тікелей әсер етеді», — деді үкімет отырысында Олжас Бектенов.
Ол қозғалысты басқару тәсілін өзгерту керек деп санайды. Бектенов Көлік министрлігіне әкімдіктермен бірлесіп, екі айда ірі қалалардағы автомобиль көп жүретін көшелерді анықтап, көлік легін интеллектуалды басқару жүйесін пилоттық режимде іске қосуды тапсырды. Сынақ кезеңі аяқталған соң тиімді шешімдер бүкіл елде қолданылады.
Көлік министрлігіне көлік активін толық есепке алып, автомобиль қозғалысын нақты уақыт режимінде басқаруға, жүктемені болжауға және ықтимал қауіпті алдын ала анықтауға мүмкіндік беретін ұлттық деңгейдегі бірыңғай цифрлық жүйені іске қосуды да тапсырды.
Биліктің Алматыда бағдаршамды «ақылды» етіп, көлік легін компьютер арқылы басқарамыз деп уәде бергеніне он жылға жуықтады. Көше электроникасының бір бөлігі жаңарғанымен, жағдай әлі толық жақсарған жоқ. Тіпті қаланың басты көлік артериясының бірі — Абай даңғылындағы бағдаршамдарда өзара синхронизация жоқ.
Комментариев: 0