Қазақстан Škoda-ның қай модельдерін шығарады

Қазанның алғашқы күндерінде Allur компаниясы Škoda-ны ел аумағына қайта кіргізіп, модельдерін Қостанайда құрастыру туралы Volkswagen Group-пен келісімге қол қойғанын хабарлады.

Компания елімізде шығатын топтаманың барлық құпиясын ашты. Жақында автосалондардан Kamiq, Karoq және Kodiaq кроссоверлерін, сонымен бірге Octavia және Superb лифтбектерін сатып алуға болады. Соңғы екі модельдің Combi нұсқасы да шығуы мүмкін. Көп ұзамай Superb буын ауыстырады, төртінші буын өкілінің тұсаукесері қарашаға жоспарланған. Бренд ертерек камуфляжбен қапталған машиналарды көрсетіп, интерьерінің ресми суреттерін жариялады.

Allur өкілдері Қостанайдағы конвейерге машина құрастыруға қажет жинақтардың келу уақытын хабарлады.

— Біз процестердің сапасына қойылатын талаптар бойынша толық мәліметті алдық. Операциялық мүмкіндігіміз серіктестеріміздің ойынан шығып отыр. Бұл бірлескен өндірісті бастау уақытын тездетеді. Сонымен бірге машина жинақтарын буып-түю және бөлшектеу процесіне қатыстық. 47-48 аптада (қарашаның аяғы-желтоқсанның басы Kolesa.kz ескерт.) жергілікті өндіріске арналған Škoda-ның сынақ партиясы келеді, — деді Млада-Болеслав қаласындағы чех зауытына барып қайтқан Allur зауытының даму жөніндегі директоры Роман Глущенко.

Škoda бренді таратқан ресми ақпаратқа сүйенсек, Қазақстан чех брендінің автомобильдерін 2024 жылы шығара бастайды. Компания бір жылда ел аумағында 15 автосалон ашуды жоспарлап отыр.

P. S. Сіз Škoda-ның қай моделін сатып алар едіңіз? Пікір жазыңыз.