Ford пен Geely Испанияда кәсіпорын ашады

24 шілдеде Ford Motor Company мен Geely Automotive Holding америкалық автоөндірушінің Валенсиядағы зауыты негізінде Испанияда бірлескен кәсіпорын құратынын хабарлады. Келісімге сәйкес Ford-тың үлесі — 66 %, Geely-дікі 34 % болады.

Жаңа компанияның мақсаты — Ford автомрбильдерін әзірлеу. Атап айтқанда, Bronco-ның Еуропадағы топтамасын шағын модельмен толықтыру және Geely агрегатымен жүретін Ford дизайнындағы кроссовер шығару. Ал Geely осы серіктестіктің арқасында Валенсиядағы зауытта өз көліктерін құрастыруға мүмкіндік алады. 2028 жылы брендтің батареялы бестселлері EX2 конвейерге тұрады, ол қазір біздің елде Geely Galaxy маркасымен саудаланып жатыр.

Қазақстандағы автосалондар сатып жатқан Geely Galaxy EX2 жайлы толық ақпаратты Kolesa.kz-тегі «Жаңа көліктер» бөлімінен көруге болады. Онда модельдің техникалық сипаттамасы, комплектациясы және бағасы толық жазылған.

Кәсіпорын 2027 жылдың бірінші жартысында іске қосылып, 2028 жылы машина құрастыра бастайды. Қазір компания реттеуші органдардың мақұлдауын күтіп отыр.

Ford-тың Валенсиядағы қазіргі зауыты Еуропадағы ең ірі өндіріс орындарының бірі саналады, онда жыл сайын 500 000 автомобиль шығады.