Škoda Қазақстанға оралады

Жуырда Қазақстан жолдарына жап-жаңа «шкодалар» шығады. Allur компаниясы Volkswagen Group-пен келісімге қол қойғанын, соған сәйкес дилерлік желі ашып, марка өнімдерін шығара бастайтынын хабарлады.

Жоспар бойынша жаңа жобаға 26 млрд теңге жұмсалады, 1500 жұмыс орны ашылады. Allur өкілі Айдар Өтешов Қостанайдағы зауытта қызмет ететін бір топ инженер қазір Чехиядағы Škoda Auto алаңында жүргенін айтты. Бірақ алғашқы партия қашан конвейерге тұратыны да, автосалондарға қашан жететіні де белгісіз.

Škoda біздің елге 2000 жылы келген. Бренд модельдерін «Бипэк Авто» саудалады, 2005 жылы марка көліктерін «Азия Авто» зауыты ірі торапты әдіспен құрастыра бастады. Škoda дилерлері таныстырған соңғы модель жаңарған Rapid болатын, тіпті 2020 жылдың аяғында тапсырыс қабылдай бастады. Алайда сол кезде «Азия Авто» кәсіпорны конвейерлерін тоқтатып, клиенттеріне Ресейде жасалған машиналарды ұсынды.