MotoGP жарысы қайтадан кейінге қалды

Халықаралық мотоспорт федерациясы (FIM), мотожарыс командаларының халықаралық қауымдастығы (IRTA) және MotoGP ұйымдастырушысы Dorna Sports бірлескен мәлімдеме жасап, биыл 14–16 маусымға жоспарланған Қазақстанда өтетін ең беделді әлемдік мотоцикл жарысы болмайтынын хабарлады.

Баспасөз релизінде белгіленген уақытта жарыстың өтпейтініне Қазақстандағы су тасқынына әкеліп соққан ауа райы жағдайы себеп болғаны жазылыпты. MotoGP тарапынан зардап шеккен он мыңдаған адамға көмектесіп жатқан ел билігі мен арнайы қызметтерге қосымша ауыртпалық түсіру жауапкершіліксіз болатыны айтылған.

Қазақстанда жарыс өтеді, бірақ кейінге қалды. Нақты уақыты әлі белгісіз. Қазақстан Гран-приі үшін ықтимал уақыт 5-7 шілдедегі Германия Гран-приі мен 2-4 тамыздағы Ұлыбритания Гран-приі арасындағы дәстүрлі жазғы демалыстың аяғы немесе тамыздың екінші жартысында болатын Аустрия мен Испаниядағы жарыс арасындағы қысқа үзіліс болуы мүмкін.

MotoGP жарысының Қазақстандағы дебюті екінші рет кейінге шегерілді. Бірінші жергілікті Гран-при былтыр шілдеде өтеді деп жоспарланған болатын. Жарыстың өтпей қалуына Sokol International Racetrack трассасындағы омологация жұмысы мен әлемдегі операциялық қиындық себеп болды.