Қос дөңгелекті көлік тізгіндеген спортшылар қатысатын әлемдегі ең беделді сайыс ауқымын кеңейтіп жатыр. Чемпионаттың ресми промоутері Dorna Sport жарыс 2023 жылы Алматы — Астана тас жолының 76-шақырымында орналасқан Sokol спорттық-жаттығу кешенінде өтетінін хабарлады. Олар қазақстандық трекпен бес жылға келісім жасапты.
Қазақстан 1949 жылдан бері дәстүрлі өтіп жатқан MotoGP жарысына қатысушыларды қабылдайтын отызыншы ел атанады. Бұл мерейтой сан жылдық тарихы бар чемпионаттың тағы бір парағын ашады. Ал Sokol International Racetrack премьер-класты жарыс өтетін 74-трасса болады, — деп жазды Dorna Sport.
Әлемдік деңгейдегі сайыстың Қазақстандағы кезеңі 2023 жылға жоспарланған, бірақ нақты уақыты белгісіз. MotoGP-дің келесі маусымы 24 наурызда Португалиядағы «Алгарве» жарыс жолында басталады.
Комментариев: 0