Қытайлық «фольксваген» біздің елде ресми саудаға шығады

Volkswagen-нің Қазақстандағы топтамасында әзірше тек Touareg бар. Бес айда оның небәрі 18-і өткен. Соған қарамастан бренд өкілдері Қытайда жасалған өнімдерін қатарға қосуға ниетті.

Көлік типін мақұлдауға қатысты дерек сақталатын реестрде Volkswagen Tayron L моделінің құжаты пайда болды. Бұл көлік үшінші буындағы еуропалық Tiguan-ның жақын туысы саналады. Машина тіпті АҚШ пен Мексикада осы атаумен сатылған.

Құжатқа сәйкес ұзындығы 4.7 метр, дөңгелек базасы 2.79 метр Tayron L бізге тікелей Чанчун қаласындағы FAW-Volkswagen зауытынан келеді.

1 / 7

• 
• 
• 
• 
• 
• 
• 

1 / 7

Автомобиль 220 ат күшіне ие (350 Нм) EA888 турбомоторымен ғана жүреді. Беріліс қорабының типі жазылмапты, бірақ мұндай техника 7 сатылы DSG-мен жабдықталады. Көліктің алдыңғы және толық жетекті түрі сертификат алды. Моножетекті нұсқадағы агрегат 188 ат күші мен 320 Нм момент беретін шығар.

Volkswagen Tayron L қашан жолға шығатыны белгісіз. Қытайда моножетекті модельдің бағасы 217 900 юаньнан (15.7 млн теңге), толық жетекті түрінікі 247 900 юаньнан (17.9 мл теңге) басталады.

Біз сөз етіп отырған модель қытайлар құрастырған алғашқы Volkswagen емес. Біраз жыл бұрын көрші елден Santana және Polo седандарын алғанбыз. Көбі Ішкі істер министрлігіне қарасты органдарда қызмет етіп жүр.