Шілдеден бастап электрондық сауда тауарлары, соның ішінде көліктің қосалқы бөлшегі мен керек-жарағы бөлек санатқа кіреді. Қаржы министрлігінің Мемлекеттік кірістер комитеті 200 еуро (шамамен 118-120 мың теңге) бажсыз лимитті қалдырғанмен, 31 кг салмақ шегін алып тастайды.
«Бір жөнелтімнің не тапсырыстың құны 200 еуродан асса, жалпы тауар бағасының 5 %-ына тең кедендіік баж салығы мен 16 % қосымша құн салығы сұралады. Сатып алушы декларация тапсырып әуре болмайды, бұл міндет электрондық сауда операторына не жеткізушіге жүктеледі. Мұндай шара жеке тұлғаны біраз әуреден арылтып, процесті едәуір ашық етеді әрі ішкі нарықты қорғайды», — деді кеденшілер. Олар автомобиль, техника не тауар партиясы сияқты ірі затқа тапсырыс бергенде оның құны мен құжатын мұқият тексеру керек екенін атап өтті.
Биыл 1 қаңтарда қандай жағдайда жеке тұлғаның ЕАЭО аумағынан тауар әкелуі жеке кәсіпкерлік ретінде саналатыны тәптіштеп жазылған норма күшіне енген. Тапсырыстың жиілігі, көлемі не орын ауыстыру сипаты коммерцияға сілтесе, салық төлеп, тауарды толыққанды рәсімдеуге тура келеді. Бұл «өзім үшін» деп жиі-жиі көп мөлшерде зат таситындарға қатысты. Мысалы, тауардың бағасы бір жыл ішінде АЕК-тің 360 еселік мөлшерінен аспауға тиіс. Толық ақпаратты Қаржы министрінің № 690 бұйрығынан алуға болады.
Комментариев: 0