21 маусым, жексенбі күні сағат 13:30 шамасында Ақтөбеде қатты дауыл соқты. «Қазгидромет» РМК мәліметінше желдің екпіні 30 м/с-ке жеткен. Жарты сағатқа созылған дауыл жұртты әбден әбігерге салды. Әкімдік хабарлағандай, жел екі көпқабатты және бес жеке тұрғын үйдің шатырын ұшырып, Ақтөбенің бес ауданын, сондай-ақ Қурайлы және Пригородный тұрғын аумағын жарықсыз қалдырған.
Электр желісінің кейбірін жел құлатқан ағаштар үзіпті. Көлік үстіне де ағаш құлады. Қаланы тазалауға 10 мердігер ұйымның арнайы техникасы мен жұмысшылары атсалысты.
Дауылдан қанша көлік бүлінгенін Ақтөбе билігі нақты айтқан жоқ. Бірақ әлеуметтік желіде тараған фото мен видеоға қарағанда, машиналар құлаған ағаш пен желге ұшқан қоқыс жәшіктерінен ғана зардап шекпеген сияқты. Желдің екпіні қатты болғаны сонша, «Газельдерді» аударып тастапты.
Қалада 22 маусымда да дауыл соғады деген болжам бар. Синоптиктер күндіз жаңбыр жауып, найзағай ойнайтынын хабарлады. Батыс, оңтүстік-батыстан соғатын желдің екпіні 15–20 метрге жетуі мүмкін. Ал Ақтөбе облысының батысында, солтүстігінде және оңтүстігінде жаңбыр жауып, найзағай ойнайды, кей жерлерде нөсер құйып, бұршақ жауады және боран болады. Жел батыс, оңтүстік-батыстан соғады. Облыстың батысы, солтүстігі мен оңтүстігінде жел екпіні секундына 23 метрге жетуі мүмкін.
Комментариев: 0