Салық кодексінде мопед туралы жазылмаған. Яғни скутер иесі салық төлеуге міндетті емес. Бірақ биыл сәуірде кейбір мопедші ескертпе алыпты. 2025 жылғы алым мөлшері — 1 АЕК (3932 теңге). Kolesa.kz оқырмандары «қандай негізде салық есептелді?» деген сұрақ қойды.
Алматы қаласы бойынша Мемлекеттік кірістер департаменті Kolesa.kz редакциясына түсіндіргендей, техпаспортында «мопед» деп жазылмаған екі дөңгелекті техника иелері хабарлама алған. Құжатта техниканың А1 санаты мен қуаты (мысалы 45 кВт) ғана көрсетілген. Кодекске сәйкес мұндай көлік құралына құзырлы орган салық салады. Ал көлік құралын есепке қою ҚР ІІМ құзырындағы жұмыс.
Департамент қызметкерлерінің айтуынша техпаспортта нақты «мопед» деп тұрса, бірақ иесіне берешек туралы хабар келсе, азамат оның күшін жоюды талап етуге құқылы. Ол үшін тұрғылықты жері бойынша аудандық мемлекеттік кірістер басқармасына барып, көлік құралын тіркеу туралы куәліктің түпнұсқасын көрсетеді. Құжатта бәрі дұрыс болса, салық органы мәліметті түзетеді. Алдағы уақытта осындай жағдай қайталанбау үшін мопед иесі ҚР ІІМ ақпараттық жүйесіндегі деректі түзету туралы өтініш бергені жөн.
Комментариев: 0