Mercedes-Benz фирмалық автохаустан бас тартады

Bild басылымы хабарлағандай, Mercedes-Benz концерні Берлиндегі жеті автосалонының бәрін канадалық кәсіпкерге сатқан. Бұл келісімшартты алдымен монополияға қарсы органдар мақұлдап, процесс жыл аяғына дейін аяқталады. Келесі кезекте Гамбург, Мюнхен және Рейн-Рур өңіріндегі автосалондар тұр.

Марканың елдегі сауда орталықтарын қысқарту шарасы былтыр жаздан бері жалғасып келеді. Бренд алдымен Ной-Ульмдегі филиалды, кейін Кобленц, Майнц, Дортмунд және Любек қаласындағы салондарды сатты. Ал биыл жыл басында Ахен, Кассель, Вюрцбург, Вупперталь, Ройтлинген және Ганновер қаласындағы өкілдікті сату туралы келісімшарт жасады.

Мұның себебі қарапайым — Mercedes-Benz машинаны өндіруші тікелей сататын жүйеге көшіп жатыр. Клиент автомобиль алу үшін онлайн немесе шоурум арқылы тікелей зауытқа тапсырыс береді, ал тәуелсіз дилер көлікті табыстау мен сервистік қызмет көрсеткені үшін комиссия алады. Сондықтан жеке сауда желісінің қажеті жоқ. Компания ресурсын люкс санатындағы автомобиль мен цифрлық сервисті дамытуға бағыттайды.

Бірақ бұл жағдайда қызметкерлердің мүддесі екінші кезекте қалып отыр. Mercedes-Benz мәліметінше қайта құрылымдау процесі Германиядағы 80 дилерлік орталықта жұмыс істейтін 8000-ға жуық адамға әсер етеді. Ірі автоөндірушілер арасында тікелей сату тәжірибесін алғаш болып Tesla қолға алған. Компания классикалық дилерден бас тартып, барлық сауданы өз сайты арқылы тікелей жүргізіп келеді.