Kolesa.kz-тегі Қытай көліктерінің саны қалай өзгерді

Көпшілік Kolesa.kz-те машинаны шыққан еліне қарай іздеуге болатынын жақсы біледі. Ондаған жыл бойы рейтингте жапон маркалары көш бастап келеді — қазір сайтта 62 мыңнан аса хабарландыру тұр. Екінші орында әдеттегідей Германия көліктері (39 000), үшінші сатыға Оңтүстік Корея (26 600) жайғасқан. Бірақ жаңа автомобиль нарығында Қытай брендтерінің үлесі айтарлықтай артып келеді. Автосалонда сатылып жатқан ең танымал он модельдің алтауы — Қытай өнімі. Жеке импорттаушылар да негізінен аталған елден техника әкеліп жатыр. Оның ішінде гибрид пен электрокар ғана емес, дәстүрлі мотормен жүретін машиналар да бар.

Үш жыл бұрын халық қытай техникасына күмәнмен қарайтын, қазір тіпті бейтаныс марка өнімін алатындар бар.

Біз Kolesa.kz-тегі хабарландыруларды 2022 жылғы жағдаймен салыстыра отырып, Қытай маркаларының Қазақстандағы үлесі қалай өзгергенін анықтадық.

2022 жылғы көктемде Ресейге санкция салынып, автонарық өзгеріске ұшырады. Логистика желісі үзілгендіктен, бірқатар өндіруші Ресей және Қазақстан нарығынан кетті, біздің елге Ресейдегі зауыттардан келетін танымал модельдер саудасы тоқтады. Сол кезде сайттағы хабарландырулар арасында Қытай өнімдері аз еді. «Жаңа автомобильдер» бөлімінде Қытай маркаларының үлесі небәрі 5 % болды. Біздің елде негізінен Chery, Haval және JAC сатылатын.

Ол кезде нарықтың басым бөлігі Жапония (37 %) мен Оңтүстік Корея (31 %) жаулап алған. АҚШ, Еуропа және Ресейдің үлесі 25 % болды. Қалған 2 % өзге елдерден келген техникалар болатын.

2023 жылы «қытайлардың» үлесі 26 %-ға жетті, ал «жапондар» мен «кәрістердің» көрсеткіші 33 және 19 %-ға дейін қысқарды. Ресей автомобильдері де азайып кетті. Ресейде Lada өндірісі қайта басталған, бірақ Қазақстанға әлі келген жоқ.

Қытай брендтері Қазақстанда көбейе түсті. 2024 жылдың басында саны (жүк көлігі мен автобусты қоспағанда) 13-ке жетті. Ал жыл аяғында Kolesa.kz-тегі Қытай машиналарының үлесі 34 % болды.

2025 жылғы он айдың қорытындысы бойынша елдегі жаңа автомобиль нарығының 52 %-ын Қытай көліктері құрап отыр. Жапон брендтері — 18 %, Корея маркалары — 12 %, АҚШ пен Еуропа өнімдері — 8 және 7 %.

Саудаланып жатқан Қытай автомобильдері көп болғанына қарап, нарықты жаулап алды деуге келмейді. Автосалондарда әлі Hyundai, Chevrolet және Kia өнімдері көп өтіп жатыр.

Мұның себебі Қытай автоөндірісіндегі ерекше тәсілде. Мысалға Chery концернін алайық. Ол биыл Қазақстанда 10.2 мың автомобиль сатты. Бірақ компания елде бір ғана бренд ретінде жұмыс істеп тұрған жоқ. Chery, Exeed, Jaecoo, Jetour, Kaiyi, Omoda атты алты маркамен сатылады. Жақында бұл қатарға Soueast пен Exltantix қосылуы мүмкін. Әрбірінің модельдік топтамасы өте кең.

Chery Automobile концернінің бүкіл маркасын қоса есептесек, 2025 жылы 24.4 мың автомобиль өткен. Бұл ел нарығындағы екінші үздік көрсеткіш. Бірінші орында Hyundai (35.7 мың машина) тұр.

Қытай брендтерінің бәрі Қазақстанда орнығып қала ала ма? Әрине, жоқ. Мысалы, Hongqi сияқты бәсекеге төтеп бере алмағандар бар. Бірақ босап қалған орынды дереу жаңа марка басады. Сол үшін елде Қытай брендтері көбеймесе, азаймайтыны анық.

2026 жылдан бастап «сұр» импорт азаятынын айта кеткен жөн. Бірақ Қытай билігі енгізетін шектеу ресми дилерлердің жұмысына әсер етпейді, керісінше, жандандыра түседі.