Келер жылы электромобиль әкелетіндердің бәрі салық төлейді

Қазақстанға электромобиль әкелетін жеке тұлғаны кедендік алымнан және қосымша құн салығынан босату ЕЭК-тің № 107 шешімімен бекітілген еді. Бұл норма 2026 жылдың 1 қаңтарына дейін ғана жарамды.

Мемлекеттік кірістер комитеті Kolesa.kz редакциясына хабарлағандай, жеңілдікті ұзарту туралы шешім қабылданған жоқ. Жаңа Салық кодексінде де электромобиль импорттаушыларға ешқандай жеңілдік қарастырылмаған.

ДСҰ мөлшерлемесі бойынша декларация жасалған жағдайда электрлі қозғалтқышы бар автомобиль үшін кедендік алым 0 % болып қала береді, бірақ хаттамаға сәйкес Қазақстан аумағынан тыс жерде сатуға болмайды. Бұл жағдайда міндетті түрде қосымша құн салығын төлеу керек. 2026 жылдан бастап жаңа Салық кодексінің 503-бабына сәйкес оның мөлшері 16 % болады.

Қазір елде электрлі қозғалтқышы бар автомобиль (гибридті қоспағанда) көлік салығы мен утиль алымынан босатылған. Жүрген электромобильді алғаш тіркеу құны дәстүрлі мотормен жүретін машинадан екі есе төмен.