GAC алғашқы жүздікті 1.9 секундта еңсеретін электрогиперкар шығарады

GAC концерні Hyper SSR гиперкарын таныстырды, модель Қытай нарығына Aion суббрендінің флагманы ретінде шығады. Ferrari модельдерін еске салатын купе осы сегменттің еуропалық және америкалық өкілдерімен бәсекеге түседі. Hyper SSR-дің күштік құрылымы толықтай электрлі болады.

1 / 5

• 
• 
• 
• 
• 

1 / 5

Hyper SSR-дің өлшемі — 4556×1988×1230 мм, дөңгелек базасы — 2650 мм. Автомобильдің сырт пішіні L тәрізді оптика және аэродинамикалық сұлбасымен ерекшеленеді. Электромобильге 20 дюймдік дөңгелек дискісін орнатқан. Купе моторы ортада орналасқан бензинді суперкарларды еске салады. Жоғарыға ашылатын есігі соларға ұқсайды.

Hyper SSR интерьерінде бұрышы бар рөл, 14.6 дюймдік ортаңғы экран, 8.8 дюймдік аспаптар панелі орналасқан. Креслоның жақсарған бүйірлік тіреуіші, желдету және массаж функциясы бар. Гиперкар салоны былғарымен қапталған.

Aion Hyper SSR-де нақты қанша мотор бары белгісіз. Бірақ олар 1224 ат күші мен 1230 Нм береді. Базалық нұсқасы 2.3 секундта 100-ге дейін жылдамдық алады, ал қымбат түрленімдері алғашқы жүздікті 0.4 секунд ерте еңсереді. Бұл Еуропадағы Rimac Nevera батареялы гиперкарының динамикасымен шамалас. Hyper SSR-дің ең жоғары жылдамдығы — 250 км/сағ. Сыйымдылығы 75 киловатт батареяның арқасында гиперкардың жүріс қоры 506 км-ге жетеді.

Ең арзан Aion Hyper SSR 1 286 000 юань (84.3 млн теңге) тұрады. Сәл жылдам түрленімді бұдан 100 мың юань қымбатқа (90.9 млн теңге) алуға болады. Жарысқа қатысуға болатын ең үздік нұсқаның бағасы — 1 686 000 юань (110.5 млн теңге). Бұрын Қытайдағы ең қымбат электрокар атанған BYD Yangwang U8 моделі 1.1 млн юань тұратын.

Yangwang суббрендімен де жақында электрлі гиперкар шығуы мүмкін. BYD купе прототипін көрсеткен. Hongqi премиум бренді бірнеше жылдан бері осындай жоба дайындап жатыр, бірақ S9 деп аталатын сәнді модель өндірісі әлі басталған жоқ.