Тұрғымбаев 2019 жылы ақпанда ішкі істер министрі болып тағайындалды. Алдымен мамандандырылған ХҚКО-дағы «көмектескіштерді» тексеріп, полиция бес адамды құрықтағанын мақтанышпен хабарлады. Бірақ содан бері қызмет көрсететін орталықтарда ештеңе өзгерген жоқ.
Ал 2019 жылы қыркүйекте ІІМ полицейлерге ала таяқты (жезл) қайтарды. Бірақ оны тәуліктің қараңғы мезгілінде және ауа райы нашар кезде жол қозғалысын реттеу үшін ғана қолдануға рұқсат етілді. Таяқ бұрынғы министр Қалмұханбет Қасымов кезінде қолданыстан шыққан. Нәтижесінде жолда тәртіп сақшыларының сигналы дұрыс көрінбей, әлекке түсті. Тіпті полицейлер көлік қозғалысын смартфон жарығымен реттеген жағдайлар да кездесті.
Е.Тұрғымбаев тұсында атқарылған тағы бір іс — жүргізуші куәлігі мен техникалық құжатсыз жүргендердің (құжаты бар болу керек) жазадан босатылуы. Дегенмен жүргізушілердің жүгін жеңілдеткен бұл идеяны полиция емес, депутаттар ойлап тапқан.
Министр қолға алған ең маңызды жұмыс ретінде армениялық және ресейлік нөмірдегі көліктермен күресті атауға болады. Тұрғымбаев Армениядан әкелінген көлік мәселесін сәтті шеше алды. Шекарашылардың көмегімен бәрін есептеп, уақытша тіркеуге тұрғызды. Армениядан жеткізіліп, Қазақстан азаматына тіркелген машиналарға сары нөмір беру әлі жалғасып жатыр (1 наурызда аяқталады). Ал Ресей нөміріндегі көліктердің жайы сәл басқаша болды. Былтыр жазда полиция сақтандырушылардың деректер базасын тексеріп, елімізде Ресейде тіркелген қанша машина жүргенін анықтады, ал күзге қарай рейд жүргізіле бастады. Жол ережесін бұзған біраз жүргізуші ұсталды, содан кейін ресейлік көлік иелері наразылық танытып, жағдай қайта жұмсарды.
Сондай-ақ ІІМ басшысы электросамокаттың қандай көлік құралы екеніне жіп таға алмай кетті. 2021 жылы маусымда ол электросамокат қозғалыс құралы емес екенін айтты, ал оған дейін самокатты мопедке теңестірген болатын. Жол ережесіне әлі өзгеріс енгізілген жоқ.
Ішкі істер министрі болып бұған дейін ҚР Бас прокурорының орынбасары қызметін атқарған, кейін Сыбайлас жемқорлыққа қарсы іс-қимыл агенттігін басқарған Марат Ахметжанов тағайындалды.
Комментариев: 0