Бүгін онлайн режимде өткен есептік кездесуде Алматы тұрғыны электросамокаттың қатысуымен болатын апат көбейгеніне шағымданды. Бұған жауап ретінде министр:
«Жылдамдығын сағатына 80 шақырымға дейін арттыратын самокаттар бар. Ал ҚР қолданыстағы заңнамасы бойынша олар жол қозғалысының құралы болып саналмайды. „Жол жүрісі туралы“ заңда самокат деген көлік жоқ. Одан бөлек, самокаттар көлік құралына қойылатын талаптарға сай келмейді. Дөңгелек диаметрі, тежеуіш жүйесі, габариттік шамдары, артқы көрініске арналған айналары мен қауіпсіздік жүйесінің болмауына қатысты мәселе бар. Қазір электросамокатпен жолда және тас жолда жүруге тыйым салынады. Себебі олар жол қозғалысына қатысушы емес», — деді.
Бұған дейін ҚР ІІМ электросамокатты мопедке теңестіріп, олардың тротуармен жүруіне тыйым салған еді. Ал бір жыл бұрын билік оларды жеке мобильділік құралы деп, оны жүргізушілердің құқығы мен міндетін заң бойынша бекітуге тырысқан. Бірақ бұл түзетулер құжатқа енбеді.
Министрдің айтуынша, электросамокат тізгіндеген азаматтардың тротуар немесе веложолақпен жүруіне рұқсат беру туралы мәселе қаралып жатыр. Ол үшін мүдделі органдардың мамандарынан тұратын топ құрылды.
Тұрғымбаев Ұлыбританияда электросамокатпен тек аулада жүруге болатынын айтты. Ал Еуропадағы басқа елдерде самокат веложолақпен сағатына 20 шақырым, тротуармен 12 шақырым жылдамдықпен ғана қозғалады.
Сөйтіп министр самокат мінгендердің жүргін бөлікке шығуына тыйым салып, тротуармен қозғалғаны жөн деді, алайда қос дөңгелекті көлік жүргізушілері мен жаяу жүргіншілер арасында да мәселе көп.
Егер шендінің «электросамокатпен жолда жүруге болмайды» дегенін ескерсек, жол ережесі бойынша жол — мемлекеттік есепке алуға жататын және көлік құралдарының жүруіне арналған инженерлік құрылыстар кешені болып табылатын жалпы пайдаланудағы автомобиль жолы, шаруашылық автомобиль жолы, қала мен елді мекен көшесі. Жол бір немесе бірнеше жүріс бөлігін, сондай-ақ трамвай жолдарын, тротуарларды, жол жиектерін және олар болған жағдайда бөлу жолақтарын қамтиды
Сонда электросамокатпен ауладан басқа еш жерде жүруге болмай ма? Қысқасы, Е.Тұрғымбаевтың жауабынан соң самокат мәселесі айқындала қоймады. Енді заң мен жол ережесіне өзгеріс енуін күтеміз.
11.06.2021 ж. 17:20-да толықтырылды:
Кейінірек брифингте министр ІІМ неліктен осы уақытқа дейін электросамокатты мопедке теңестіріп келгенін білмейтінін айтты.
«Мопед, мотоцикл, велосипед шығаратын кез келген өндіруші жол қозғалысына қатысушыға тиісті сертификат береді. Егер самокат иесі сол талаптарға толық сай болып, жолға шыққысы келсе және жол қозғалысына қатысуды қаласа, қолында жүргізуші куәлігі болу керек. Егер мопедке теңестірілетін болса, кез келген мопедтің нөмірі болуы қажет. Елдегі ешбір самокаттың тіркеу нөмірі жоқ. Бұл ақпаратты кім бергенін, қай БАҚ жариялағанын анықтауды тапсырам, әрі тексеріс жүргіземіз», — деді министр және тағы қателесті! Себебі сағатына 50 шақырымнан төмен жылдамдықпен жүретін көлік құралдары тіркелмейді, сәйкесінше оларға мемлекеттік нөмір де берілмейді.
Комментариев: 0